କେନ୍ଦୁଝର: ଦିନକୁ ଦିନ ପ୍ରଦୂଷଣର ମାତ୍ରା ବଢ଼ିବାରେ ଲାଗିଛି । ଯାହା ସମସ୍ତଙ୍କ ପାଇଁ ମୁଣ୍ଡବିନ୍ଧାର କାରଣ ହୋଇଛି । ଏହି ପ୍ରଦୂଷଣକୁ ରୋକିବାକୁ ବେସରକାରୀ ଓ ସରକାରୀ ସ୍ତରରେ ମଧ୍ୟ ବହୁ ପ୍ରୟାସ ଜାରି ରହିଛି । ବର୍ତ୍ତମାନ ପରିବେଶ ପ୍ରଦୂଷଣର ଏକ ମୁଖ୍ୟ କାରଣ ହେଉଛି ବିଭିନ୍ନ ଯାନବାହାନରୁ ବାହାରୁଥିବା ପ୍ରଦୂଷିତ ଧୂଆଁ । ଏହି ଧୂଆଁ ପ୍ରାଣୀଜଗତ ସହ ପରିବେଶକୁ ମଧ୍ୟ କ୍ଷତି ପହଞ୍ଚାଇଥାଏ । ଏହି ପରିବେଶ ପ୍ରଦୂଷଣକୁ ରୋକିବାକୁ ଏକ ନୂତନ ପ୍ରୟାସ କରିଛନ୍ତି କେନ୍ଦୁଝରର ଜନାର୍ଦ୍ଦନ ଗିରି । ସେ ନିଜ ପ୍ରଚେଷ୍ଟାରେ ଏକ ସୋଲାର କାର ପ୍ରସ୍ତୁତ କରିବା ସହ ତାକୁ ବ୍ୟବହାର କରି ଆସୁଛନ୍ତି । ଯାହାକୁ ନେଇ ତାଙ୍କୁ ଅନେକ ପ୍ରଶଂସା କରିଛନ୍ତି ।
ସୂଚନା ଲୋକ ସମ୍ପର୍କ ବିଭାଗରୁ ଇଲେକ୍ଟ୍ରିକାଲ ଡିଭିଜନର ଇଂଜିନିୟର ଭାବେ ଅବସର ପରେ କେନ୍ଦୁଝର ଜିଲ୍ଲାରେ ପ୍ରଥମେ ଏକ ଇଲେକ୍ଟ୍ରିକ ବାଇକ ଦୋକାନ କରିଥିଲେ । ଜନାର୍ଦ୍ଦନ କେନ୍ଦୁଝର ସହରରୁ ଦଶ କିଲୋମିଟର ଦୂର ଗୋପାଳପୁର ଗ୍ରାମରେ ସପରିବାର ବସବାସ କରନ୍ତି । ସେ ସବୁଦିନ ଦୋକାନ ଓ ନାତି ନାତୁଣୀଙ୍କୁ କେନ୍ଦୁଝର ସହରକୁ ନେବା ଆଣିବା ପାଇଁ ନିଜ କାର ବ୍ୟବହାର କରନ୍ତି । ଏହି କାର ବ୍ୟବହାର ଦ୍ବାରା ପେଟ୍ରୋଲ ଖର୍ଚ୍ଚ ତାଙ୍କୁ ବାଧିବା ସହ ପରିବେଶ ପ୍ରଦୂଷଣ କଥା ମଧ୍ୟ ତାଙ୍କ ମନକୁ ଆନ୍ଦୋଳିତ କରିଥିଲା । ଏଥିପାଇଁ ସେ ସାନ ପୁଅଙ୍କ ସାହାଯ୍ୟରେ ନିଜ କାରଟିକୁ ସୋଲାର କାର କରିବାକୁ ଚିନ୍ତା କରିଥିଲେ । ନିଜର ପୁରୁଣା କାରରୁ ଇଞ୍ଜିନଟିକୁ ଖୋଲି ସେଥିରେ ବିଏଲଡିସି ମଟର, କଣ୍ଟ୍ରୋଲର, ପାଞ୍ଚୋଟି ସୋଲାର ପ୍ୟାନେଲ ଆଦି ଲଗେଇ ସୋଲାର କାର ନିର୍ମାଣ କରିଛନ୍ତି ଜନାର୍ଦ୍ଦନ ଗିରି ।ଏଥିପାଇଁ ଜନାର୍ଦ୍ଦନଙ୍କୁ ଏକ ଲକ୍ଷ ଟଙ୍କାରୁ ଊର୍ଦ୍ଧ୍ବ ଟଙ୍କା ଖର୍ଚ୍ଚ କରିବାକୁ ପଡିଥିଲା । ଜନାର୍ଦ୍ଦନ ଏହି କାରକୁ ବ୍ୟବହାର କରି ଖର୍ଚ୍ଚ ବଞ୍ଚାଇବା ସହ ପରିବେଶକୁ ମଧ୍ୟ ପ୍ରଦୂଷଣ ମୁକ୍ତ କରିବାରେ ସଫଳ ହୋଇଛନ୍ତି ।