କେନ୍ଦୁଝର: ଭୂତ ଭୟରେ ସରକାରୀ ବିଦ୍ୟାଳୟରେ ତାଲା । କେନ୍ଦୁଝର ଜିଲ୍ଲା ହରିଚନ୍ଦନପୁର ବ୍ଲକ ଭଅଁରପୁର ପ୍ରାଥମିକ ବିଦ୍ୟାଳୟର ସ୍ବଳ୍ପବ୍ୟୟ ଆବାସିକ ସ୍କୁଲରେ ଭୂତ ଭୟରେ 2 ଜଣ ଛାତ୍ରୀ ଚେତାଶୂନ୍ୟ ହୋଇ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଛନ୍ତି। ଯାହାଫଳରେ ଅଭିଭାବକ ମହଲରେ ଭୟର ବାତାବରଣ ଦେଖାଯାଇଛି ।
ଭିଡିଓ ସୌଜନ୍ୟ:ସମ୍ବାଦଦାତା, କେନ୍ଦୁଝର ଉକ୍ତ ଛାତ୍ରବାସରେ ଆଜକୁ ୩ଦିନ ହେବ ଭୂତର ଭୟ ଦେଖା ଦେଇଛି । ଏହି ଛାତ୍ରବାସରେ ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ୪୦ଜଣ ଛାତ୍ରଛାତ୍ରୀ ରହୁଥିବା ବେଳେ ବର୍ତ୍ତମାନ ଏହି ସ୍କୁଲ ପରିସରରେ ତାଲା ଝୁଲୁଛି । ଭୌତିକ କାଣ୍ଡ କାରଣରୁ ୨ଦିନ ମଧ୍ୟରେ ୭ଜଣ ଛାତ୍ରୀ ଚେତାଶୁନ୍ୟ ହୋଇ ହରିଚନ୍ଦନପୁର ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି ହେବା ପରେ ସ୍କୁଲରେ ଭୟର ବାତାବରଣ ଦେଖାଯାଇଛି । ଯାହା ଫଳରେ ବିଦ୍ୟାଳୟକୁ ଛାତ୍ରଛାତ୍ରୀ ଆସିବାକୁ ଭୟ କରୁଛନ୍ତି ।
ହଷ୍ଟେଲ ପାର୍ଶ୍ବରେ ଥିବା ପରିଶ୍ରାଗାରକୁ ଯିବା ମାତ୍ରେ ଛାତ୍ରୀମାନେ ଚିତ୍କାର କରି ଚେତା ଶୂନ୍ୟ ହୋଇ ପଡୁଛନ୍ତି । ଚିକିତ୍ସା ପରେ ଫେରିଥିବା କିଛି ଛାତ୍ରୀ ସ୍କୁଲ ପରିସରରେ ପହଁଞ୍ଚିବା ପରେ ପୁଣି ଚେତା ଶୂନ୍ୟ ହୋଇଯିବା ଘଟଣା ସ୍କୁଲରେ ଭୟର ବାତାବରଣ ବଢାଇବା ସହ ଅଭିଭାବକମାନଙ୍କୁ ଚିନ୍ତାରେ ପକାଇଛି । ଭୟଭୀତ ଅଭିଭାବକ ମାନେ ନିଜ ନିଜ ପିଲାମାନଙ୍କୁ ସ୍କୁଲରୁ ଘରକୁ ନେଇ ଯାଇଛନ୍ତି ।
ତେବେ ଗ୍ରାମବାସୀଙ୍କ କହିବା ଅନୁଯାୟୀ ପୂର୍ବରୁ ଏହି ସ୍ଥାନରେ ଭୌତିକ ଘଟଣା ସାମ୍ନାକୁ ଆସୁଥିଲା କିନ୍ତୁ ସ୍କୁଲ ଆରମ୍ଭ ପରଠାରୁ କୌଣସି ଘଟଣା ସାମ୍ନାକୁ ଆସିନଥିଲା । ମାତ୍ର ଏବେ ଏହି ଘଟଣା ସାମ୍ନାକୁ ଆସିବା ପରେ ସମସ୍ତଙ୍କ ପାଇଁ ଚିନ୍ତାର କାରଣ ପାଲଟିଛି । ଭୌତିକ କାରଣ ହେଉ କିମ୍ବା ଅନ୍ୟ କୌଣସି କାରଣ ହେଉ ଏହି ଘଟଣା ଦିଗରେ ଶିଘ୍ର ପଦକ୍ଷେପ ଗ୍ରହଣ କରି ସ୍କୁଲରେ ଶିକ୍ଷାଦାନ ସ୍ବଭାବିକ କରିବା ପାଇଁ ଦାବି ହୋଇଛି ।
ଏନେଇ ଜିଲ୍ଲା ପ୍ରକଳ୍ପ ସଂଯୋଜକଙ୍କୁ ପଚାରିବାରୁ ଛାତ୍ରୀଙ୍କର କଣ ହେଇଛି ସେନେଇ ଡାକ୍ତରୀ ପରୀକ୍ଷା ଚାଲିଛି । କିଛି ଭୌତିକ କାଣ୍ଡକୁ ଏଡାଇ ଯାଇଥିବା ବେଳେ ବ୍ଲକ ଶିକ୍ଷାଧିକାରୀଙ୍କୁ ଏନେଇ ତଦନ୍ତ କରାଯିବା ପାଇଁ ନିର୍ଦ୍ଦେଶ ଦିଆଯାଇଥିବା ପ୍ରକାଶ କରିଛନ୍ତି ।
କେନ୍ଦୁଝରରୁ ସନ୍ତୋଷ, ମହାପାତ୍ର, ଇଟିଭି ଭାରତ
