ବିଶ୍ବର ବଡରଥରେ ବସି ମାଉସୀ ମା’ ଘରକୁ ଗଲେ ବଳଦେବଜୀଉ

ଶାନ୍ତି ଶୃଙ୍ଖଳାର ସହ ଅନୁଷ୍ଠିତ ହେଲା କେନ୍ଦୁଝର ଜିଲ୍ଲାର ଆରାଧ୍ୟ ଦେବତା ଶ୍ରୀ ବଳଦେବଜୀଉଙ୍କ ଘୋଷଯାତ୍ରା ।

କେନ୍ଦୁଝର: ଜିଲ୍ଲାର ଆରାଧ୍ୟ ଦେବତା ଶ୍ରୀ ବଳଦେବଜୀଉଙ୍କ ଘୋଷଯାତ୍ରା ଅନୁଷ୍ଠିତ ହୋଇଯାଇଛି । ବିଶ୍ବର ସବୁଠାରୁ ବଡ଼ ରଥ ଭାବେ ପରିଚିତ ଏହି ନନ୍ଦିଘୋଷ ରଥରେ ମହାପ୍ରଭୁ ବଳଦେବଜୀଉ, ଭାଇ ଜଗନ୍ନାଥ, ଭଉଣୀ ସୁଭଦ୍ରାଙ୍କ ସହ ମାଉସୀ ମା'ଙ୍କ ଘରକୁ ଯାତ୍ରା କରିଛନ୍ତି ।

୧୬୬୧ ମସିହାରୁ ତତ୍କାଳୀନ ରାଜା ଲକ୍ଷ୍ମୀ ନାରାୟଣ ଭଞ୍ଜଦେଓଙ୍କ ସମୟରୁ ଏହି ରଥଯାତ୍ରା ଅନୁଷ୍ଠିତ ହେଇଆସୁଛି । ଏହି ଯାତ୍ରାକୁ ସୁରୁଖୁରୁରେ ଶେଷ କରିବା ପାଇଁ ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି । ପୋଲିସ ପକ୍ଷରୁ ମଧ୍ୟ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ।

ଏହି ରଥଯାତ୍ରା ବଳଦେବଜୀଉଙ୍କ ଛେରା ପହଁରା ନୀତି ପରେ ଅନୁଷ୍ଠିତ ହୋଇଛି । ବିଭିନ୍ନ ଅନୁଷ୍ଠାନ ମାନଙ୍କ ପକ୍ଷରୁ ପ୍ରସାଦ ସେବନର ବ୍ୟବସ୍ଥା ମଧ୍ୟ କରାଯାଇଛି । କେନ୍ଦୁଝରର ପୁରୁଣା ସହର ଠାରେ ଅନୁଷ୍ଠିତ ଏହି ଘୋଷଯାତ୍ରାରେ ଚର୍ତୁର୍ଦ୍ଧାମୂରତି ମାଉସୀ ମା'ଙ୍କ ଘରେ ପହଞ୍ଚିଥିଲେ । ଏହି ରଥଯାତ୍ରା ଦେଖିବା ପାଇଁ ଜିଲ୍ଲାର କୋଣଅନୁକୋଣରୁ ଲକ୍ଷାଧିକ ଭକ୍ତ ଆସି ସାମିଲ ହୋଇଥିଲେ ।

କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ