କେନ୍ଦୁଝର: ଦିନକୁ ଦିନ ତୈଳଦର ବୃଦ୍ଧି ହେବାରେ ଲାଗିଛି । ଏହାକୁ ଲଗାମ ଲାଗେଇବାରେ ମୋଦି ସରକାର ବିଫଳ ହୋଇଛନ୍ତି । ଏହା ସହ ନୂତନ କୃଷି ଆଇନକୁ ଜୋର ଜବରଦସ୍ତ ଲାଗୁ କରିବାକୁ ପ୍ରୟାସ କରୁଛି ମୋଦି ସରକାର । ସେହିପରି ରାଜ୍ୟରେ ନବୀନ ପଟ୍ଟନାୟକ ସରକାର ଘରୋଇ ଶିକ୍ଷାନୁଷ୍ଠାନ ସହ ହାତ ମିଳାଇଛନ୍ତି । ସେଥିପାଇଁ ବିଭିନ୍ନ ସରକାରୀ ସ୍କୁଲ ଓ କଲେଜର ଫି ବୃଦ୍ଧି କରିଛନ୍ତି । ଏହି ସବୁ ଅଭିଯୋଗରେ କେନ୍ଦୁଝର ଜିଲ୍ଲାରେ ଛାତ୍ର କଂଗ୍ରେସ ପକ୍ଷରୁ କମ୍ପନ ସମାବେଶ ଅନୁଷ୍ଠିତ ହୋଇଯାଇଛି।
ବିଭିନ୍ନ ଦାବିନେଇ ଛାତ୍ର କଂଗ୍ରେସର ପ୍ରତିବାଦ ସହ ଶୋଭାଯାତ୍ରା
ପ୍ରଥମେ ଜିଲ୍ଲା କଂଗ୍ରେସ କାର୍ଯ୍ୟାଳୟରେ ଏକ ବୈଠକ ଅନୁଷ୍ଠିତ ହୋଇଥିଲା । ପରେ ରାଜ୍ୟ ଛାତ୍ର କଂଗ୍ରେସ ସଭାପତିଙ୍କ ନେତୃତ୍ବରେ ଶତାଧିକ ଛାତ୍ର କଂଗ୍ରେସ କର୍ମୀ ଏକ ଶୋଭାଯାତ୍ରାରେ ଆସି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ । କେନ୍ଦ୍ର ସରକାରଙ୍କ ତୈଳ ଦର ବୃଦ୍ଧି, କୃଷି ଆଇନ ଏବଂ ରାଜ୍ୟ ସରକାରଙ୍କ ସ୍କୁଲଓ କଲେଜ ଫି ବୃଦ୍ଧି ପ୍ରତ୍ୟାହାର ଦାବି କରିଥିଲା ଛାତ୍ର କଂଗ୍ରେସ ।