ମୂଲ୍ୟବାନ ଗଛକାଟି ବେସରକାରୀ ସ୍କୁଲ ନିର୍ମାଣ ଅଭିଯୋଗ, ବନବିଭାଗ ଚୁପ୍

ଜଙ୍ଗଲ ମଧ୍ୟରୁ ମୂଲ୍ୟବାନ ଗଛ କାଟି ବେସରକାରୀ ସ୍କୁଲର ଗୃହ ନିର୍ମାଣ କାର୍ଯ୍ୟ ଚାଲିଥିବାବେଳେ ବାରମ୍ବାର ଗ୍ରାମବାସୀଙ୍କ ଅଭିଯୋଗ ସତ୍ତ୍ବେ ବନବିଭାଗ ଅଧିକାରୀ ଚୁପ୍ ହୋଇ ବସିଥିବା ଅଭିଯୋଗ ହୋଇଛି ।

କେନ୍ଦୁଝର: ମୂଲ୍ୟବାନ ଗଛକାଟି ବେସରକାରୀ ସ୍କୁଲ ନିର୍ମାଣ ଅଭିଯୋଗ । ଜଙ୍ଗଲ ମଧ୍ୟରୁ ମୂଲ୍ୟବାନ ଗଛ କାଟି ବେସରକାରୀ ସ୍କୁଲର ଗୃହ ନିର୍ମାଣ କାର୍ଯ୍ୟ ଚାଲିଥିବାବେଳେ ବାରମ୍ବାର ଗ୍ରାମବାସୀଙ୍କ ଅଭିଯୋଗ ସତ୍ତ୍ବେ ବନବିଭାଗ ଅଧିକାରୀ ଚୁପ୍ ହୋଇ ବସିଥିବା ଅଭିଯୋଗ ହୋଇଛି ।

ଖବର ଅନୁଯାୟୀ, କେନ୍ଦୁଝର ବ୍ରାହ୍ମଣୀପାଳ ରେଞ୍ଜ ରେବଣାପଳାଶପାଳ ବନବିଭାଗ ଅଧିନସ୍ଥ ସୁନାପେଣ୍ଠ ହାଇସ୍କୁଲର ପିଅନ ତ୍ରିଲୋଚନ ମହାନ୍ତ ଟିଗିରିଆ ଗ୍ରାମ ନିକଟସ୍ଥ ଜଙ୍ଗଲରୁ ୬ ମାସ ପୂର୍ବେ ଅନେକ ମୂଲ୍ୟବାନ ଗଛ କାଟି ନେଇଥିଲେ । ଯେଉଁ ଗଛ କାଠରେ ବେସରକାରୀ ସ୍କୁଲ ନିମନ୍ତେ ଘର ନିର୍ମାଣ କାର୍ଯ୍ୟ ଚାଲିଥିବା ଜଣାପଡିଛି ।

ଏନେଇ ଗ୍ରାମର ଲୋକମାନେ ରେବଣାପଳାଶପାଳ ବନପାଳଙ୍କୁ ବାରମ୍ବାର ଲିଖିତ ଅଭିଯୋଗ କରିଆସୁଛନ୍ତି । ମାତ୍ର ବିଭାଗ ପକ୍ଷରୁ ଏନେଇ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ । ଯାହାକୁ ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଉଛି ।

ଏଥିସହ ବନପାଳଙ୍କ ଠାରୁ ନିରାଶ ହେବା ପରେ ଗ୍ରାମର ଲୋକମାନେ ବ୍ରାହ୍ଣଣୀପାଳ ରେଞ୍ଜର ଭୁବନାନନ୍ଦ ମହାପାତ୍ରଙ୍କ ପାଖରେ ଏକ ଲିଖିତ ଅଭିଯୋଗ କରିଥିବା ଜଣାପଡିଛି । ଘଟଣା ସମ୍ପର୍କରେ ଅଭିଯୋଗ ପରେ ରେଞ୍ଜର କିଛି ବନ କର୍ମଚାରୀଙ୍କୁ ନେଇ ତଦନ୍ତ ପାଇଁ ଘଟଣାସ୍ଥଳକୁ ଯାଇଥିଲେ ।

ଏହି ଘଟଣାକୁ ନେଇ ରେଞ୍ଜରଙ୍କ ପ୍ରତିକ୍ରିୟା ପାଇଁ ଯୋଗାଯୋଗ କରାଯାଇଥିଲେ ହେଁ ଯୋଗାଯୋଗ ହୋଇପାରିନାହିଁ । ଏଥିପ୍ରତି ବନବିଭାଗର ଉଚ୍ଚପଦସ୍ତ ଅଧିକାରୀ ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରି ଆଇନ ଅନୁଯାୟୀ ଉଚିତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଜନସାଧାରଣରେ ଦାବି ହେଇଛି ।

କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ