କୋର୍ଟରୁ ବାପ-ପୁଅ ଚମ୍ପଟ: ସିଏସଆଇ ଓ 3 କନେଷ୍ଟବଳ ନିଲମ୍ବିତ, ପୁଅ ଅଟକ

ଜାମିନ ଆବେଦନ ଖାରଜ ହେବାରୁ ସେସନ କୋର୍ଟରୁ ଚମ୍ପଟ ମାରିଛନ୍ତି କଏଦୀ ବାପ-ପୁଅ । ଘଟଣାରେ ନିଲମ୍ବିତ ହୋଇଛନ୍ତି କୋର୍ଟ ସିଏସଆଇଙ୍କ ସମେତ 3ଜଣ କନେଷ୍ଟବଳ । ପରେ ଛାନଭିନ ପରେ ମିଳିଛି ପୁଅ ।

କେନ୍ଦୁଝର: ଜାମିନ ଆବେଦନ ଖାରଜ ହେବାରୁ ସେସନ କୋର୍ଟରୁ ଚମ୍ପଟ ମାରିଛନ୍ତି କଏଦୀ ବାପ-ପୁଅ । ଘଟଣାରେ ନିଲମ୍ବିତ ହୋଇଛନ୍ତି କୋର୍ଟ ସିଏସଆଇଙ୍କ ସମେତ 3ଜଣ କନେଷ୍ଟବଳ । ନିଲମ୍ବିତ ସିଏସଆଇ ହେଉଛନ୍ତି ଦୁଷ୍ମନ୍ତ ସିଂ । ଏଥିସହ କନେଷ୍ଟବଳ ମନୋରମା ସେଠୀ, ଶିବାନୀ ନାୟକ ଓ ରେଣୁବାଳା ମହାନ୍ତି ମଧ୍ୟ ଘଟଣାରେ ନିଲମ୍ବିତ ହୋଇଛନ୍ତି ।

ସୂଚନା ଅନୁଯାୟୀ ସୋମବାର ତେଲକୋଇ ଥାନା ସରୁଆଳି ଗ୍ରାମରେ ଜାତିଆଣ ଆକ୍ଷେପ ସହ ବିଭିନ୍ନ ସଙ୍ଗୀନ ମାମଲାରେ ଦାସ ଖୁଣ୍ଟିଆ ଓ ପୁଅ ଅନିଲ ଖୁଣ୍ଟିଆଙ୍କ ନାମରେ ଅଭିଯୋଗ ହୋଇଥିଲା । ଏନେଇ ଦୁହେଁ ଉଚ୍ଚ ନ୍ୟାୟାଳୟରେ ଆଗୁଆ ଜାମିନ ପାଇଥିଲେ । ଯାହାକୁ ନେଇ ସେସନ କୋର୍ଟରେ ଦୁହିଁଙ୍କୁ ହାଜର କରାଯାଇଥିଲା । ହେଲେ ସେସନ କୋର୍ଟ ସେମାନଙ୍କ ଜାମିନ ଆବେଦନକୁ ଖାରଜ କରିଦେଇଥିଲେ ।

ନୋଟିସ ପାଇବା ପୂର୍ବରୁ ଅଭିଯୁକ୍ତ ବାପ-ପୁଅ କୋର୍ଟରୁ ଚମ୍ପଟ ମାରିଥିଲେ । ଏନେଇ ଟାଉନ ଥାନାରେ ମାମଲା ରୁଜୁ କରି ପୋଲିସ ଛାନଭିନ ଆରମ୍ଭ କରିଥିଲା । ଫଳରେ ଜଣେ ସିଏସଆଇଙ୍କ ସମେତ 3ଜଣ କନେଷ୍ଟବଳଙ୍କୁ ନିଲମ୍ବିତ କରାଯାଇଛି । ତେବେ ଛାନଭିନ ପରେ ଫେରାର ପୁଅ ଅନିଲ ଖୁଣ୍ଟିଆ ମିଳିଥିବାରୁ ତାକୁ ଅଟକ ରଖିଛି ପୋଲିସ ।

କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ