ଭତ୍ତା ପାଇଁ 10 କିମି, ହରଡଘଣାରେ ବୃଦ୍ଧା ଓ ଦିବ୍ୟାଙ୍ଗ

ମାଲଦା ପଞ୍ଚାୟତର ଜମିରିଡ଼ିହି ଗ୍ରାମରେ ବାର୍ଦ୍ଧକ୍ୟ ଓ ଭିନ୍ନକ୍ଷମ ଭତ୍ତା ପାଇଁ ହିତାଧିକାରୀଙ୍କୁ ଯିବାକୁ ପଡୁଛି 10 କିଲୋମିଟର ।

କେନ୍ଦୁଝର: ସରକାର ସମସ୍ତ ବୃଦ୍ଧବୃଦ୍ଧା ଓ ଦିବ୍ୟାଙ୍ଗମାନଙ୍କୁ ସହାୟତା ପ୍ରଦାନ କରିବାକୁ ବଦ୍ଧ ପରିକର । ଏହି ଯୋଜନା ବାବଦକୁ ସରକାର କୋଟି କୋଟି ଟଙ୍କା ବ୍ୟୟ କରୁଛନ୍ତି । ଏପରିକି ସେମାନଙ୍କ ନିକଟରେ ଏହି ସୁବିଧାଗୁଡିକ ସହଜରେ ଉପଲବ୍ଧ ହେବା ପାଇଁ ସରକାର ପ୍ରତିଶ୍ରୁତି ବଦ୍ଧ । ହେଲେ ଏସବୁର ବ୍ୟତିକ୍ରମ ଦେଖିବାକୁ ମିଳିଛି କେନ୍ଦୁଝର ମାଲଦା ପଞ୍ଚାୟତର ଜମିରିଡ଼ିହି ଗ୍ରାମରେ । ଗ୍ରାମରେ ଭତ୍ତା ପାଇବାକୁ ଥିବା ହିତାଧିକାରୀଙ୍କୁ ଚାଲିଚାଲି ଯିବାକୁ ପଡୁଛି 10 କିଲୋମିଟର ।

ଜମିରିଡ଼ିହି ଗ୍ରାମରେ ପାଞ୍ଚ ଶହରୁ ଉର୍ଦ୍ଧ୍ବ ଲୋକ ବସବାସ କରନ୍ତି । ସେଥି ମଧ୍ୟରୁ ପଚାଶରୁ ଉର୍ଦ୍ଧ୍ବ ବୃଦ୍ଧବୃଦ୍ଧା ଓ ଦିବ୍ୟାଙ୍ଗ ବ୍ୟକ୍ତି ଅଛନ୍ତି । ଏଥି ମଧ୍ୟରୁ ଅଧିକାଂଶ ସରକାରୀ ସୁବିଧାରୁ ବଞ୍ଚିତ ଥିବାବେଳେ ଅଳ୍ପ କିଛି ଜଣଙ୍କୁ ଭତ୍ତା ପ୍ରଦାନ କରାଯାଉଛି । କିନ୍ତୁ ଏହି ଭତ୍ତା ପାଇବା ପାଇଁ ଏହି ବୃଦ୍ଧବୃଦ୍ଧା ତଥା ଦିବ୍ୟାଙ୍ଗମାନଙ୍କୁ ଅନେକ କଷ୍ଟ ସ୍ବୀକାର କରିବାକୁ ପଡୁଛି ।

ଗ୍ରାମଟି ଏକ ବଣ ଜଙ୍ଗଲ ଘେରା ଅଞ୍ଚଳ ହୋଇଥିବାବେଳେ ଏହା ପଞ୍ଚାୟତ କାର୍ଯ୍ୟାଳୟ ଠାରୁ ଦଶ କିଲୋମିଟର ଦୂରରେ ଅବସ୍ଥିତ । ଭତ୍ତା ଆଣିବାକୁ ପଞ୍ଚାୟତକୁ ଗଲାବେଳେ ହାତୀ ହାବୁଡ଼ରେ ପଡିବାର ଭୟ ରହିଛି । ସେଥିପାଇଁ ସନ୍ଧ୍ୟା ହୋଇଗଲେ ଅନ୍ୟ ଗ୍ରାମରେ ରାତି କାଟିବାକୁ ପଡୁଛି । ପାଞ୍ଚ ଶହ ଟଙ୍କା ଭତ୍ତା ପାଇଁ ଦୁଇ ଦିନ ବାହାରେ ରହିବାକୁ ପଡୁଛି । ଏପରିକି ଅଟୋ ଭଡାକଲେ ସବୁ ଭତ୍ତା ଟଙ୍କା ସେଥିରେ ଖର୍ଚ୍ଚ କରିବାକୁ ପଡୁଛି ।

ଜିଲ୍ଲା ପ୍ରକଳ୍ପ ନିର୍ଦ୍ଦେଶକଙ୍କୁ ଏ ସଂପର୍କରେ ପଚାରିବାରୁ ସେ ଗ୍ରାମର ବୃଦ୍ଧବୃଦ୍ଧା ମାନଙ୍କ ପାଇଁ ଗ୍ରାମ ମଧ୍ୟରେ ଭତ୍ତା ଟଙ୍କା ଦେବାର ବ୍ୟବସ୍ଥା କରାଯିବ ବୋଲି ପ୍ରକାଶ କରିଛନ୍ତି । ଏହା ସହ ଗ୍ରାମରେ ରହିଥିବା ଅନ୍ୟ ହିତାଧିକାରୀଙ୍କ ପାଇଁ ଅତି ଶୀଘ୍ର ଭତ୍ତା ଦେବା ପାଇଁ ବ୍ୟବସ୍ଥା କରାଯିବ ବୋଲି କହିଛନ୍ତି ।

କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ