କେନ୍ଦୁଝର: ଧାନର ଅଭାବି ବିକ୍ରି ନେଇ ଚାଷୀ ବିଭିନ୍ନ ସମସ୍ୟାର ସମ୍ମୁଖୀନ ହେଉଛି । ଏହି ଅଭିଯୋଗ ନେଇ କେନ୍ଦୁଝର ଜିଲ୍ଲାପାଳଙ୍କ କାର୍ଯ୍ୟାଳୟ ଘେରିଲେ ନବ ନିର୍ମାଣ କୃଷକ ସଂଗଠନ । ୪ ଦଫା ଦାବି ନେଇ କାର୍ଯ୍ୟାଳୟ ଘେରାଉ କରିବା ସହ ସଂଗଠନ ପକ୍ଷରୁ ଏକ ଦାବିପତ୍ର ଜିଲ୍ଲାପାଳଙ୍କୁ ପ୍ରଦାନ କରାଯାଇଛି ।
ଧାନର ଅଭାବି ବିକ୍ରି ନେଇ ରାଜରାସ୍ତାରେ ଚାଷୀ
ଚଳିତ ଖରିଫ ଋତୁରେ ସରକାରଙ୍କ ନିର୍ଦ୍ଦେଶ ମୁତାବିକ ଚାଷୀମାନେ ବିଭିନ୍ନ ସରକାରୀ ସଂସ୍ଥା ମାଧ୍ୟମରେ ଧାନ ବିକ୍ରି କରିଥିଲେ । ମାତ୍ର ବହୁ ଚାଷୀଙ୍କର ଟୋକନ ଆସିଥିଲେ ମଧ୍ୟ ସରକାର ତାଙ୍କ ଧାନ କିଣି ନଥିଲେ । ଏପରିକି ମାସ ମାସ ବିତି ଯାଇଥିଲେ ସୁଦ୍ଧା କିପରି ଏହାର ସମାଧାନ କରାଯିବ, ସେ ନେଇ କିଛି ସରକାର କୌଣସି ପଦକ୍ଷେପ ଗ୍ରହଣ କରୁନାହାଁନ୍ତି । ଏପଟେ ରାଜ୍ୟରେ ମୌସୁମୀ ପହଞ୍ଚିବାକୁ ଥିବାବେଳେ ଧାନ ବିକ୍ରି ନେଇ କୃଷକର ହାତ ଖାଲି ରହିଛି ।