କେନ୍ଦୁଝର: ବାରହା ଶିକାର ପାଇଁ ବିଛା ଯାଇଥିବା ଫାଶରେ ପଡି ନାବାଳିକା ଗୁରୁତର । ଗୁରୁତର ନାବାଳିକା ହେଲେ ଉଦୟଗିରି ଗାଁର ପ୍ରତିମା ସାହୁ । ସୂଚନାନୁଯାୟୀ, ଶୁକ୍ରବାର ବିଳମ୍ବିତ ରାତିରେ ଶୌଚ ପାଇଁ ପ୍ରତିମା ସାଙ୍ଗ ମାନଙ୍କ ସହିତ ଗାଁ ନିକଟ ଜଙ୍ଗଲକୁ ଯାଇଥିଲେ । ଅସାବଧାନତା ବଶତଃ ବାରହା ଫାଶରେ ପଡିଯାଇଥିଲେ ।
ବାରହା ଶିକାର ପାଇଁ କପନାଳି ଜଙ୍ଗଲରେ ମଧ୍ୟରେ ଯାଇଥିବା ୧୧କେଭି ଉଚ୍ଚ ଶକ୍ତି ସମ୍ପନ୍ନ ବିଦ୍ୟୁତ ଲାଇନରେ ହୁକ ପକାଇ ଶିକାରୀ ମାନେ ଫାଶ ବସାଇଥିଲେ । ନାବାଳିକା ଜଣଙ୍କ ଏହି ଫାଶରେ ଲାଗିଯିବା ଫଳରେ ତାଙ୍କ ଶରୀରରେ ଗଭୀର କ୍ଷତ ହୋଇଛି । ନାବାଳିକା ଜଣଙ୍କ ଫାଶରେ ପଡିଯିବା ଦେଖି ଶିକାରୀ ମାନେ ୧୧ କେଭି ବିଦ୍ୟୁତ ଲାଇନରୁ ହୁକକୁ ଖୋଲିଦେଇ ଦୌଡ଼ି ପଳେଇଥିଲେ । ସାଙ୍ଗ ମାନେ ଗାଁ ଲୋକଙ୍କ ସହାୟତାରେ ପ୍ରତିମାଙ୍କୁ ଉଦ୍ଧାର କରି ତେଲକୋଇ ମେଡିକାଲରେ ଭର୍ତ୍ତି କରିଥିଲେ। ଘଟଣାସ୍ଥଳରେ ବନବିଭାଗ ଓ ବିଦ୍ୟୁତ ବିଭାଗ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ