କେନ୍ଦୁଝର: ନଦୀରେ ଭାସୁଛି ଲକ୍ଷାଧିକ ଟଙ୍କାର ମୂଲ୍ୟବାନ ଗଛର ଚାରା । ସରକାର ଜଙ୍ଗଲ ସୃଷ୍ଟି ଓ ତାର ରକ୍ଷଣାବେକ୍ଷଣ ନିମନ୍ତେ ବାର୍ଷିକ କୋଟି କୋଟି ଟଙ୍କାର ଯୋଜନା ଉପରେ ଯୋଜନା ପ୍ରସ୍ତୁତ କରିଛନ୍ତି । ମାତ୍ର ଜଙ୍ଗଲ ବିଭାଗର ଅବହେଳା ଯୋଗୁଁ ଉକ୍ତ ଯୋଜନା ଗୁଡିକ ଠିକ୍ ଭାବେ ରୂପାୟନ ହୋଇପାରୁ ନାହିଁ । ସଠିକ୍ ତଦାରଖ୍ ହୋଇ ପାରୁ ନଥିବାକୁ ନେଇ ଯୋଜନା ଗୁଡିକର ଅର୍ଥ ପାଣିରେ ପଡୁଥିବା ଦେଖିବାକୁ ମିଳିଛି ।
ନଦୀରେ ଭାସୁଛି ଲକ୍ଷାଧିକ ଟଙ୍କାର ମୂଲ୍ୟବାନ ଗଛ ଚାରା
ଏମିତି ଏକ ଘଟଣା କେନ୍ଦୁଝର ଜିଲ୍ଲା ଦୈତାରୀ ରେଞ୍ଜ ରେବଣାପଳାଶପାଳ ବନବିଭାଗ ନିକଟସ୍ଥ କୁଶେଇ ନଦୀରେ ଲକ୍ଷାଧିକ ଟଙ୍କାର ମୂଲ୍ୟବାନ ଗଛର ଚାରା ଭାସୁଥିବା ଦେଖିବାକୁ ମିଳିଛି । ପକାଯାଇଥିବା ଚାରା ଗୁଡିକରୁ ଅଧିକାଂଶ ପାଣିର ସ୍ରୋତରେ ଭାସି ଯାଇଥିବା ବେଳେ ଅନେକ ଚାରା ନଦୀର କୂଳରେ ଭାସୁଥିବା ଦେଖିବାକୁ ମିଳିଛି । ଖବର ଅନୁଯାୟୀ ରୋପଣ ନିମନ୍ତେ ଅନେକ ଟଙ୍କା ଖର୍ଚ୍ଚରେ ପ୍ରସ୍ତୁତ ହୋଇଥିବା ବିଭିନ୍ନ ମୂଲ୍ୟବାନ ଗଛର ଚାରା ଗୁଡିକୁ ଆଜକୁ ୩ ଦିନ ପୂର୍ବେ କୁଶେଇ ସେତୁ ନିକଟସ୍ଥ ନଦୀରେ ପକାଯାଇଛି ।