ଲକଡାଉନ ପ୍ରଭାବ: ପରାଧୀନ ମଣିଷ, ସ୍ବାଧୀନ ବନ୍ୟଜନ୍ତୁ

ପ୍ରକୃତିର ନିୟମ ଅନୁସାରେ ସୃଷ୍ଟି ଓ ସ୍ରଷ୍ଟା ଉଭୟେ ପରିପୁରକ ଭାବେ ପରିଚାଳିତ । କିନ୍ତୁ ସମୟକ୍ରମେ ନିଜ ସୁବିଧା ଓ ଆବଶ୍ୟକତା ପୂରଣ କରିବାକୁ ଯାଇ ପ୍ରକୃତିକୁ ପରୋକ୍ଷରେ ନିଜ ଅଧୀନସ୍ଥ କରି ବସିଛି ମଣିଷ ।

କେନ୍ଦୁଝର: ପ୍ରକୃତିର ନିୟମ ଅନୁସାରେ ସୃଷ୍ଟି ଓ ସ୍ରଷ୍ଟା ଉଭୟେ ପରିପୁରକ ଭାବେ ପରିଚାଳିତ । କିନ୍ତୁ ସମୟକ୍ରମେ ନିଜ ସୁବିଧା ଓ ଆବଶ୍ୟକତା ପୂରଣ କରିବାକୁ ଯାଇ ପ୍ରକୃତିକୁ ପରୋକ୍ଷରେ ନିଜ ଅଧୀନସ୍ଥ କରି ବସିଛି ମଣିଷ । ଫଳରେ ଅସନ୍ତୁଳିତ ହୋଇଛି ପରିବେଶ । କେବେ ଅମ୍ଳ ବର୍ଷା ତ କେବେ ପୁଣି ଜଙ୍ଗଲ କ୍ଷୟ ଆକରରେ ନଷ୍ଟ ହୋଇଚାଲିଛି ପରିବେଶ । ହେଲେ ପ୍ରକୃତିର ନିୟମ ଆଗରେ ମଣିଷ ଯେ ତୁଚ୍ଛ ମାତ୍ର, ତାହା ପ୍ରମାଣ କରି ଦେଖାଇଛି କୋରୋନା ଜନିତ ଲକଡାଉନ ।

ଯେଉଁ ମଣିଷ ଦିନେ ପ୍ରକୃତି ଉପରେ ନିଜର ଆଧିପତ୍ୟ ଜାହିର କରୁଥିଲା ଆଜି ସେହି ମଣିଷ କୋରୋନା ସଂକ୍ରମଣ ପାଇଁ ଘରେ ବନ୍ଦୀ । ଅପରପାର୍ଶ୍ବରେ ସତେ ଯେମିତି ନିଜ ହଜିଯାଇଥିବା ସ୍ବାଧୀନତା ଫେରି ପାଇଛନ୍ତି ବନ୍ୟ ଜୀବଜନ୍ତୁ । ରାଜ୍ୟର ହାତୀ ଉପଗ୍ରବ ଅଞ୍ଚଳ ଭାବେ ଜଣା ଯାଉଥିବା କେନ୍ଦୁଝର ଜିଲ୍ଲାରେ ମଧ୍ୟ ଦେଖିବାକୁ ମିଳିଛି ଏହାର ଉଦାହରଣ । ଆଗରୁ ଅଧିକାଂଶ ସମୟରେ ମଣିଷ ଓ ହାତୀଙ୍କ ମଧ୍ୟରେ ଲଢେଇର ନଜିର ରହିଥିବା ବେଳେ ଏବେ ମଣିଷ ଘରେ ବନ୍ଦୀ ଥିବାରୁ ଜଙ୍ଗଲରେ ଖୋଲାରେ ବିଚରଣ କରୁଛନ୍ତି ଜିଲ୍ଲାରେ ଥିବା ପ୍ରାୟ 50 ହାତୀ । ମଣିଷ ନିଜ ସ୍ବାର୍ଥ୍ୟ ପାଇଁ ହାତୀ ଭଳି ବନ୍ୟଜନ୍ତୁଙ୍କ ଖାଦ୍ୟ ଓ ବାସହ ଉଭୟ ନଷ୍ଟ କରିଚାଲିଥିଲା । ହେଲେ ଏବେ ଲକଡାଉନ ପାଇଁ ଆଉ ଜଙ୍ଗଲ ମଧ୍ୟକୁ ଅବାଧ ପ୍ରବେଶ କରୁନାହିଁ ମଣିଷ ।

ତେଣେ ସମୟ ସମୟେ ଖାଦ୍ୟ ସନ୍ଧାନରେ ବିଲ ଓ କ୍ଷେତକୁ ମାଡି ଆସନ୍ତି ପଲ ପଲ ହାତୀ । ନଷ୍ଟ କରନ୍ତି ଶସ୍ୟ ଓ ଭାଙ୍ଗି ଦିଅନ୍ତି ମଣିଷର ବାସ । ବନ୍ୟଜନ୍ତୁ ଗାଁ ମୁହାଁ ହେଉଥିବା ଦେଖି ଲାଭ ଉଠାନ୍ତି ଖଣି ମାଫିଆ ଓ କାଠ ମାଫିଆ । ହେଲେ ପରିସ୍ଥିତି ସମ୍ପୂର୍ଣ୍ଣ ଭିନ୍ନ । ମଣିଷ ଘରେ ରହି ଜଙ୍ଗଲ ସୁରକ୍ଷା ପ୍ରତି ହୋଇଛି ଅଧିକ ସଜାଗ । ଲୋକେ ଜଙ୍ଗଲ ଜଗିବାରୁ ଆଉ କାଠ ଚୋରା ଚାଲାଣ ହେଉ ନାହିଁ କି ଜମୁନି ଖଣି ମାଫିଆଙ୍କ ରାଜ । ଏପରି ସ୍ଥିତିରେ ପୂର୍ବ ଅବସ୍ଥାକୁ ଫେରିଛି ପ୍ରକୃତି । ଏବେ ଜଙ୍ଗଲରେ ମୁକ୍ତ ବିଚରଣ କରୁଛନ୍ତି ହାତୀ । ଆଉ ଗାଁ ଆଡେ ଆସିବାକୁ ମନ କରୁ ନାହାନ୍ତି । ଫଳରେ ଦୀର୍ଘ ବର୍ଷ ଧରି ମଣିଷ ଓ ହାତୀ ମଧ୍ୟରେ ଚାଲିଥିବା ଲଢେଇରେ ଲାଗିଛି ଲଗାମ ।

ଏନେଇ କେନ୍ଦୁଝର ବନଖଣ୍ଡ ଅନ୍ତର୍ଗତ ଜଙ୍ଗଲରେ 50ରୁ ଉର୍ଦ୍ଧ୍ବ ହାତୀ ନିଜ ପରିବାର ସହ ବିଚରଣ କରୁଥିବା ଜଙ୍ଗଲ ଅଧିକାରୀ ପ୍ରକାଶ କରିଛନ୍ତି । ଦୀର୍ଘ ଏକ ମାସ ମଧ୍ୟରେ ଜିଲ୍ଲାରେ କୌଣସି ହାତୀମଣିଷ ଲଢେଇ ହୋଇନଥିବା ମଧ୍ୟ ସେ ପ୍ରକାଶ କରିଛନ୍ତି । ତେଣୁ ବାସ୍ତବରେ ଏହି ଲକଡାଉନ ପ୍ରାଣୀ ଜଗତ ଓ ପ୍ରକୃତି ଉପରେ ଅନେକ ସକାରାତ୍ମକ ପ୍ରଭାବ ପକାଇଛି କହିଲେ କିଛି ଭୁଲ ହେବ ନାହିଁ ।

କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ