କେନ୍ଦୁଝର: କୁହାଯାଏ ଦୃଢ ଇଚ୍ଛା ଶକ୍ତି ଆଉ ଅଦମ୍ୟ ଆଗ୍ରହ, ସମସ୍ୟା ସମାଧାନ ବାଟ ବାହାର କରେ । ଯାହାର ପ୍ରତ୍ୟକ୍ଷ ଉଦାହରଣ ସାଜିଛନ୍ତି କେନ୍ଦୁଝର ବନେଇକଳାର ଲକ୍ଷ୍ମୀ ମୁଣ୍ଡା । ପାଣି ପାଇଁ ସ୍ତ୍ରୀର ଦୁଃଖ ସହି ନପାରି ନିଜ ଉଦ୍ୟମରେ ତିଆରି କରିଛନ୍ତି କାଠ ତିଆରି ନଳକୂପ । ତା ପୁଣି ଭୂତଳ ଜଳରୁ ନୁହେଁ, 500 ମିଟର ଦୂରରେ ଥିବା ପୋଖରୀ ପାଣିରୁ । ଯେଉଁଥିରୁ ଝର ଝର ହୋଇ ଝରିପଡୁଛି ଖୁସିର ପାଣି ।
ଲକ୍ଷ୍ମୀଙ୍କ ଲକ୍ଷ୍ୟ ପୂରଣ, ଅଗଣାରେ ପହଞ୍ଚିଲା ଜଳ
ଇଲେକ୍ଟ୍ରିକ ୱାରିଂ ପାଇପ ସହ ଏକ ମିଟର ଲମ୍ବ ସ୍ପଞ୍ଜ, ଖଣ୍ଡେ ଲୁହାଜାଲି, ଗୋଟିଏ ଲୁହା ରଡ ଓ ତିନି ଫୁଟ ପ୍ଲାଷ୍ଟିକ ପାଇପ୍ କିଣି ସେଥିରେ ପତ୍ନୀ ଜଙ୍ଗଲରୁ ଆଣିଥିବା କାଠ ସାହାଯ୍ୟରେ, ଏପରି ନଳକୂପ ତିଆରି କରିଛନ୍ତି ଲକ୍ଷ୍ମୀ । ଗାଁ ମୁଣ୍ଡରେ ଥିବା ସରକାରୀ ପୋଖରୀରୁ ଏପରି ଭାବେ ୱାରିଂ ପାଇପ ପକାଇ ବିଲରେ ବିଲରେ ଘର ଅଗଣାକୁ ପହଞ୍ଚାଇଛନ୍ତି ପାଣି । ଯାହାକୁ ତାଙ୍କ ପରିବାର ସହ ଗାଁର ଅନ୍ୟ ଲୋକ ମଧ୍ୟ ବ୍ୟବହାର କରୁଛନ୍ତି ।