ଫେଲ ମାରିଲା ସରକାରଙ୍କ ଉଠା ଜଳସେଚନ ପ୍ରକଳ୍ପ, ଚିନ୍ତାରେ ଚାଷୀ

ପାଣିରେ ପଡିଲା ସରକାରଙ୍କର ଲକ୍ଷଲକ୍ଷ ଟଙ୍କା । ପରିତ୍ୟକ୍ତ ଅବସ୍ଥାକୁ ଚାଲିଗଲାଣି ତାଳଗାଁରେ ନିର୍ମିତ ହୋଇଥିବା ୩ଟି ଉଠା ଜଳସେଚନ । ଅଧିକ ପଢନ୍ତୁ...

ଆନନ୍ଦପୁର:ଚାଷ କାମ ଯାହାର କେଡେ ସୁଖ ତାହାର, ହେଲେ ବର୍ତ୍ତମାନ ଏ ଉକ୍ତିଟି ଭୁଲ ପ୍ରମାଣିତ ହେଉଛି । ଚାଷକାମ ଯାହାର ସବୁ ଦୁଃଖ ତାହାର, କାରଣ ବର୍ତ୍ତମାନ ଚାଷ ପାଇଁ ଚାଷୀ ବହୁ ଅସୁବିଧା ସମ୍ମୁଖନ ହେଉଛି । କେନ୍ଦୁଝର ଘସିପୁରା ବ୍ଲକ ଗୋହିରା ପଞ୍ଚାୟତ ତାଳଗାଁର ଶତାଧିକ ଚାଷୀ । ଚାଷୀଙ୍କ ସୁବିଧା ପାଇଁ ତାଳଗାଁରେ ସରକାର କରିଥିଲେ ୩ଟି ଉଠା ଜଳସେଚନ । ଯାହା ଦ୍ବାରା ଚାଷ ଜମିକୁ ସହଜରେ ପାଣି ଯୋଗାଇ ପାରିବେ ଚାଷୀ । କିନ୍ତୁ ବିଭାଗୀୟ ଅଧିକାରୀ, ସ୍ଥାନୀୟ କୁଜିନେତା ଓ ଠିକାଦାରଙ୍କ ମଧୁଚନ୍ଦ୍ରିକା ଫଳରେ ତାହା ଆଜି ପର୍ଯ୍ଯନ୍ତ କାର୍ଯ୍ୟକ୍ଷମ ହୋଇ ପାରିଲା ନାହିଁ । ନିମ୍ନ ମାନର କାମ ଓ ରକ୍ଷାବେକ୍ଷଣ ଅଭାବ ଯୋଗୁଁ ତାହା ପରିତ୍ୟକ୍ତ ଅବସ୍ଥାକୁ ଚାଲିଯାଇଥିବା ଚାଷୀ ଅଭିଯୋଗ କରିଛନ୍ତି । ଫଳରେ ଚାଷ ଜମିକୁ ପାଣି ଯୋଗାଇବା ଆଶା ଏବେ ମଉଳିଛି ।

ଚାଷ ପାଇଁ ପାଣି ସମସ୍ୟା ଦୂର କରିବା ପାଇଁ ଚାଷୀ ମାନଙ୍କର ବହୁ ଦାବୀ ପରେ ସରକାର ୨୦୧୫ ମସିହା ଆର୍ଥୀକ ବର୍ଷରେ ୩ଟି ଉଠା ଜଳସେଚନ ପ୍ରକଳ୍ପ ଏଠାରେ କରିଥିଲେ । ହେଲେ ଏହାର ରକ୍ଷଣାବେକ୍ଷଣ ଅଭାବ ଯୋଗୁଁ କିଏ ମୋଟର ପମ୍ପ ଓ ତାରକୁ ମଧ୍ୟ ଚୋରି କରି ନେଲେଣି । ସେଠାରେ ପଡିଥିବା ବିଦ୍ୟୁତ ଖୁଣ୍ଟ ଏବଂ ଭଙ୍ଗା ପାଇପ ଦେଖିଲେ ଏହା କେତେ ସଫଳ ହୋଇପାରୁଛି ତାହା ସ୍ପଷ୍ଟ ବାରି ହୋଇପଡୁଛି । ଏନେଇ ତୁରନ୍ତ ତଦନ୍ତ କରାଯାଇ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ସହ ପ୍ରକଳ୍ପ କିପରି କାର୍ଯ୍ୟକ୍ଷମ ହେବ ସେଥିପାଇଁ ପଦକ୍ଷେପ ନେବାକୁ ଦାବି ହେଉଛି ।

ଆନନ୍ଦପୁରରୁ ସ୍ମୃତିରଞ୍ଜନ ବିହାରୀ, ଇଟିଭି ଭାରତ