ରକ୍ଷକ ସାଜିଲେ ଭକ୍ଷକ: ବଦଳି ପୂର୍ବରୁ ବେଧଡକ ଗଛ କାଟିଲେ ଡେପୁଟି ରେଞ୍ଜର

ଜଙ୍ଗଲ ସଂରକ୍ଷଣ ବଦଳରେ ଭକ୍ଷକ ସାଜି କାଟିଲେ ଗଛ । ଖୋଦ ଡେପୁଟି ରେଞ୍ଜରଙ୍କ ନିର୍ଦ୍ଦେଶକ୍ରମେ ଶତାଧିକ ଗଛ କାଟିଲେ ଠିକାଦାର । ଯାହା ବିଭାଗର କାର୍ଯ୍ୟଧାରା ପ୍ରତି ଆଶଙ୍କା ସୃଷ୍ଟି ହୋଇଛି ।

କେନ୍ଦୁଝର: ତେଲକୋଇ ବନାଞ୍ଚଳରେ ବେଧଡକ ଚାଲିଛି ଗଛକଟା । ଜଙ୍ଗଲ ସଂରକ୍ଷଣ ବଦଳରେ ଭକ୍ଷକ ସାଜି କାଟିଲେ ଗଛ । ଖୋଦ ଡେପୁଟି ରେଞ୍ଜରଙ୍କ ଆଦେଶ କ୍ରମେ କଟା ଚାଲିଥିଲା ଶତାଧିକ ଗଛ । ବଦଳି ହେବା ପୂର୍ବରୁ ବେଆଇନ ଭାବେ ଗଛ କାଟିବାକୁ ଠିକାଦାରଙ୍କୁ ଦେଇଥିଲେ ନିର୍ଦ୍ଦେଶ । ଘଟଣା ଜଣାପଡିବା ପରେ କାଠ ଜବତ କରିଛନ୍ତି ରେଞ୍ଜର ।

ସୂଚନାଯୋଗ୍ୟ, ଡେପୁଟି ରେଞ୍ଜରଙ୍କ କିଛି ଦିନ ପରେ ବଦଳି ହେବାର ଅଛି । ଯାହା ପୂର୍ବରୁ ସେ ଠିକାଦାରଙ୍କୁ ଲଗାଇ କଳାପାଟ ଜଙ୍ଗଲରେ ବେଆଇନ ଭାବେ ଶହେରୁ ଊର୍ଦ୍ଧ୍ବ ଗଛ କାଟିବାକୁ ନିର୍ଦ୍ଦେଶ ଦେଇଥିଲେ । ତେବେ ଏହି ବେଆଇନ ଗଛକଟା ବିଷୟରେ ଉକ୍ତ ବନାଞ୍ଚଳ ଦାୟିତ୍ବରେ ଥିବା ଗାର୍ଡ ମଧ୍ୟ ଅଜ୍ଞ ଥିବା ଜଣାପଡିଛି ।

ତେବେ କୌଣସି ଏକ ବିଶେଷ ସୂତ୍ରରୁ ଏହି ଘଟଣା ବିଷୟରେ ଫରେଷ୍ଟର ବେଆଇନ ଗଛକଟାକୁ ନେଇ ତେଲକୋଇ ରେଞ୍ଜରଙ୍କୁ ଜଣାଇଥିଲେ । ଏହା ପରେ ରେଞ୍ଜର ଉକ୍ତ କତଳାପାଟ ଜଙ୍ଗଲରେ କଟା ହୋଇଥିବା ବିଭିନ୍ନ ଶାଳ ଗଛକୁ ଜବତ କରିଛନ୍ତି । ଜବତ ହୋଇଥିବା କାଠର ମୂଲ୍ୟ ଲକ୍ଷାଧିକ ଟଙ୍କା ହେବା ଅନୁମାନ କରାଯାଉଛି । ଜଙ୍ଗଲ ସଂରକ୍ଷଣ ବଦଳରେ ଏଭଳି ବେଆଇନ ଭାବେ ଗଛ କାଟୁଥିବା ନେଇ ବିଭାଗର କାର୍ଯ୍ୟଧାରା ପ୍ରତି ଆଶଙ୍କା ସୃଷ୍ଟି ହୋଇଛି ।

କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ