କେନ୍ଦୁଝର :ରାଜ୍ୟର ବିତ୍ତଶାଳୀ ଓ ପ୍ରଭାବୀ ଟ୍ରକ ମାଲିକ ସଙ୍ଘ ଭାବେ କେନ୍ଦୁଝର ଜିଲ୍ଲା ଟ୍ରକ ମାଲିକ ସଙ୍ଘ ପରିଚିତ । ଏହି ଟ୍ରକ ମାଲିକ ସଙ୍ଘ ନିର୍ବାଚନ ନେଇ ବିବାଦ ସୃଷ୍ଟି ହୋଇଛି । ଏନେଇ ଦୁଇ ପକ୍ଷ ପ୍ରଶାସନର ଦ୍ୱାରସ୍ଥ ହୋଇଛନ୍ତି । ହେଲେ କିଛି ସମାଧାନ ନହେବାରୁ ଆଜି ଶତାଧିକ ସଦସ୍ୟ ଜିଲ୍ଲା ଟ୍ରକ ମାଲିକ ସଙ୍ଘ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲେ ।
ବର୍ତ୍ତମାନ କର୍ମକର୍ତ୍ତାଙ୍କ କାର୍ଯ୍ୟକାଳ ଅବଧି ସରିଯାଇଥିଲେ ହେଁ ନୂତନ ନିର୍ବାଚନ କରିବାକୁ ଅମଙ୍ଗ ହେଉଥିବା ସଦସ୍ୟ ଅଭିଯୋଗ କରିଥିଲେ । ସମସ୍ତ ସଦସ୍ୟ ଯଥାଶୀଘ୍ର ନିର୍ବାଚନ କରି ନୂତନ କର୍ମକର୍ତ୍ତା ବାଛିବାକୁ ଅଡ଼ି ବସିଥିଲେ । ଏନେଇ ସଦସ୍ୟଙ୍କ ଏକ ପ୍ରତିନିଧିଦଳ ଅତିରିକ୍ତ ଜିଲ୍ଲାପାଳଙ୍କୁ ଭେଟିଥିଲେ । ପ୍ରଶାସନ ପକ୍ଷରୁ ନିର୍ଭର ପ୍ରତିଶୃତି ନମିଳିବାରୁ ଶହଶହ ସଦସ୍ୟ ରାସ୍ତାରୋକ କରିଥିଲେ । ବହୁ ସମୟ ରାସ୍ତାଜାମ ହେବାରୁ ପ୍ରଶାସନ ଅଗଷ୍ଟ ୧୫ ପରେ ନିର୍ବାଚନ କରିବାକୁ ପ୍ରତିଶୃତି ଦେଇଥିଲା । ଏହାପରେ ରାସ୍ତାରୋକ ହଟିଥିଲା ।
ଇଟିଭି ଭାରତ, କେନ୍ଦୁଝର