ଦିବ୍ୟାଙ୍ଗ ଖେଳିଲେ ହୋଲି

ହୋଲିର ରଙ୍ଗରେ ରଙ୍ଗେଇ ହେଲେ ଦିବ୍ୟାଙ୍ଗ। ସାଧାରଣ ପିଲାଟିଏ ପରି ଏମାନେ ବି ଧୁମଧାମରେ ପାଳିଛନ୍ତି ରଙ୍ଗରପର୍ବ ହୋଲି। କେନ୍ଦୁଝର 'ପ୍ରୟାସ' ଅନୁଷ୍ଠାନ ପରିସରରେ ଦିବ୍ୟାଙ୍ଗ ପିଲାଙ୍କ ସହ ସାମିଲ ହୋଇଥିଲେ ସ୍ଥାନୀୟ ଇଂରାଜୀ ମାଧ୍ୟମ ସ୍କୁଲର ଛାତ୍ରଛାତ୍ରୀ।

କେନ୍ଦୁଝର : ରଙ୍ଗର ପର୍ବରେ ପୁରା ମସଗୁଲ ସମସ୍ତେ। ଜାତି ବର୍ଣ୍ଣ ନିର୍ବିଶେଷରେ ସମସ୍ତେ ପାଳୁଛନ୍ତି ଏହି ଭାଇଚାରାର ପର୍ବ ହୋଲି। ପିଲାଠୁ ବୁଢା ସମସ୍ତଙ୍କ ମନରେ ଆନନ୍ଦର ଉଲ୍ଲାସ। ଏହି ଆନନ୍ଦ ଉଲ୍ଲାସ ମଧ୍ୟରେ ରଙ୍ଗରେ ରଙ୍ଗେଇ ହେଲେ ଦିବ୍ୟାଙ୍ଗ ଅନୁଷ୍ଠାନର ଅନ୍ତେବାସୀ। କେନ୍ଦୁଝର ସହରର ନିକଟସ୍ଥ 'ପ୍ରୟାସ' ଅନୁଷ୍ଠାନ ପରିସରରେ ସମସ୍ତ ଅନ୍ତେବାସୀ ସକାଳୁ ଏହି ମୁହୁର୍ତ୍ତକୁ ଯେପରି ଅନାଇ ବସିଥିଲେ।

ବିଭିନ୍ନ ରଙ୍ଗରେ ସୁସଜ୍ଜିତ ହୋଇଥିଲା ଥାଳି । ଏହି ସବୁ ଥିଲା ପ୍ରାକୃତିକ ରଙ୍ଗ। ପ୍ରଥମେ ଅନୁଷ୍ଠାନର ଅନ୍ତେବାସୀଙ୍କ ଦ୍ଵାରା ଦହିହାଣ୍ଡି ଭଙ୍ଗା ଯାଇ ହୋଲି ଖେଳର ଶୁଭାରମ୍ଭ କରାଯାଇଥିଲା। ପରେ ସବୁ ଅନ୍ତେବାସୀ ଥାଳିରେ ଥିବା ପ୍ରାକୃତିକ ରଙ୍ଗରେ ହୋଲି ଖେଳିଥିଲେ।

ଏହି ଦିବ୍ୟାଙ୍ଗ ଅନ୍ତେବାସୀଙ୍କ ସହ ମଧ୍ୟ ସାମିଲ ହୋଇଥିଲେ ନିକଟସ୍ଥ ଇଂରାଜୀ ମାଧ୍ୟମ ବିଦ୍ୟାଳୟର ଛାତ୍ରଛାତ୍ରୀ ଏବଂ ସହରର ବରିଷ୍ଠ ବ୍ୟକ୍ତି ।

କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ