ଆନନ୍ଦପୁର: କେତେ ଆଶା ଥିଲା ପକ୍କା ଘରଟିଏ ହବ ଆଉ ଶୀତ ବର୍ଷା ଦାଉରୁ ରକ୍ଷା ମିଳିବ। ସରକାରୀ ବାବୁ ମାନଙ୍କ କହିବା ପରେ ସୁଧ ଟଙ୍କାରେ ଘର ନିର୍ମାଣ କାର୍ଯ୍ୟ ଆରମ୍ଭ ମଧ୍ୟ ହେଲା । ହେଲେ ବିଲ୍ ପାଇଁ ବ୍ଲକ ଧାଇଁ ଧାଇଁ ଶେଷରେ ଜାଣିବାକୁ ମିଳିଲା ଟଙ୍କା ଆଉ କାହା ପାଖକୁ ପଳାଇଛି। ନାଁ ଏବେ ପରିବାର ଚଳେଇ ହେଉଛି ନାଁ ସୁଧରେ ଆଣିଥିବା ଟଙ୍କାର ସୁଧ ସୁଝି ହେଉଛି। ଆବାସ ଯୋଜନାରେ ସାମିଲ ହୋଇ ଦୁଃଖରେ କାଳାତିପାତ କରୁଛନ୍ତି ଜଣେ ଆଦିବାସୀ ବ୍ୟକ୍ତି ।
ଜଣକ ନାଁରେ ଆସିଲା ଆବାସ, ଆଉ କାହା ଖାତାକୁ ଗଲା ଟଙ୍କା ଛାଉଣୀ ଅଭାବରୁ ଘର ଛପର ନଇଁ ମାଟିରେ ଲାଗିଲାଣି। ଏହି ଗରିବ କୁଡ଼ିଆରେ ରହୁଛନ୍ତି କେନ୍ଦୁଝର ଜିଲ୍ଲା ଘସିପୁରା ବ୍ଲକ ଓସ୍ତପୁରା ଗାଁର ବିଦା ଟୁଡୁ । ବିଦା ଜଣେ ଅସହାୟ ବ୍ୟକ୍ତି ହୋଇଥିବା ବେଳେ ତାଙ୍କର ଦୁଇ ପୁଅ ବାହାର ରାଜ୍ୟରେ ରହି ଦାଦନ ଶ୍ରମିକ ଭାବେ କାମ କରନ୍ତି। ବ୍ଲକ କର୍ମଚାରୀଙ୍କ କହିବା ପରେ ଆବାସ ଯୋଜନାରେ ସାମିଲ ହୋଇଥିବା ଜାଣି ସୁଧରେ ଟଙ୍କା ଆଣି ଘରଟିଏ ଆରମ୍ଭ କରିଥିଲେ ସେ । ହେଲେ କର୍ମଚାରୀଙ୍କ ଦାୟିତ୍ବହୀନତା ଯୋଗୁଁ ଯୋଜନାରେ ମିଳିବାକୁ ଥିବା ଅର୍ଥ ତାଙ୍କୁ ନମିଳି ମିଳିଥିଲା ଗାଁର ବିଦା ମୁଣ୍ଡା ନାମକ ଅନ୍ୟ ଜଣେ ବ୍ୟକ୍ତିଙ୍କୁ। ବିଦା ଟୁଡୁ ଷ୍ଟେଟ ବ୍ୟାଙ୍କ ଆକାଉଣ୍ଟ ଦେଇଥିବା ବେଳେ ଟଙ୍କା ଗଲା ବ୍ୟାଙ୍କ ଅଫ ବରୋଦା ଆକାଉଣ୍ଟକୁ। ସବୁ ଜାଣିବା ପରେ ବିଦା ବ୍ଲକ କାର୍ଯ୍ୟାଳୟ ଦୌଡ଼ି ଦୌଡ଼ି ନୟାନ୍ତ ହେଇଗଲେଣି ହେଲେ ତାଙ୍କ ଦୁଃଖ ଶୁଣୁଛି କିଏ। କର୍ମଚାରୀ ନିଜର ଦାୟିତ୍ବହୀନତା ପରେ ଚୁପ ରହିଗଲେ, ଏପଟେ ସୁଧରେ ଆଣିଥିବା ଟଙ୍କାର ସୁଧ ଦେବାକୁ ଅକ୍ଷମ ବିଦା । ଘଟଣା ସମ୍ପର୍କରେ ଘସିପୁରା ବିଡ଼ିଓଙ୍କ ଦୃଷ୍ଟି ଆକର୍ଷଣ କରିବାରୁ ସେ ଏ ସମ୍ପର୍କରେ ଅବଗତ ଅଛନ୍ତି ଓ ପୁଙ୍ଖାନୁପୁଙ୍ଖ ତଦନ୍ତ କରିବା ପରେ ବିହିତ ପଦକ୍ଷେପ ନେବେ ବୋଲି ପ୍ରକାଶ କରିଛନ୍ତି।ଭୁଲ ଯାହାର ହେଉନା କାହିଁକି ଅବ୍ୟବସ୍ଥା ଭିତରେ ରହିଛନ୍ତି ପ୍ରକୃତ ହିତାଧିକାରୀ ତେଣୁ, ଘଟଣାର ତଦନ୍ତ କରିବା ସହି ତାଙ୍କୁ ତୁରନ୍ତ ତାଙ୍କ ପ୍ରାପ୍ୟ ଯୋଗାଇଦେବା ଉଚିତ ।
ଆନନ୍ଦପୁରରୁ ସ୍ମୃତିରଞ୍ଜନ ବିହାରୀ, ଇଟିଭି ଭାରତ
