କେନ୍ଦୁଝରରେ ନାହିଁ ବର୍ଷା, ଚାଷୀ ନିରାଶ

କେନ୍ଦୁଝରରେ ନାହିଁ ବର୍ଷା, ଚାଷୀ ନିରାଶ । ବର୍ଷା ଅଭାବରେ କେନ୍ଦୁଝରରେ ଫାଟି ଆଁ କରିଛି ଚାଷ ଜମି । ତଳି ନଷ୍ଟ ହେଲାଣି । ଏସବୁ ଦେଖି ଚାଷୀ ହତାଶ ହୋଇପଡିଛି । ସେପଟେ ଚିନ୍ତା ନକରି ବର୍ଷା ହେବା ପର୍ଯ୍ୟନ୍ତ ଅପେକ୍ଷା କରିବାକୁ ଜିଲ୍ଲା କୃଷି ବିଭାଗ କହିଛି ।

କେନ୍ଦୁଝର: କଥାରେ ଅଛି, ଚାଷ ଯାହାର କି ଆନନ୍ଦ ତାହାର । କିନ୍ତୁ ଏହି ଆନନ୍ଦ ଆଉ ନାହିଁ ଚାଷୀ ଭାଇ ମନରେ । ଶ୍ରାବଣ ମାସ ସରିବାକୁ ବସିଲାଣି । ହେଲେ ବିଲରେ ପାଣି ନଥିବାରୁ ଚାଷୀ ହତାଶ । ଯାହା କିଛି ତଳି ପକାଇଥିଲେ ତାହା ଏବେ ନଷ୍ଟ ହେବାକୁ ବସିଲାଣି । ଯାହାକୁ ନେଇ ଚାଷୀ ମୁଣ୍ଡରେ ଚଡକ ପଡିଛି ।

ଚଳିତ ବର୍ଷ କେନ୍ଦୁଝରରେ ନାହିଁ ବର୍ଷା । ବର୍ଷା ଅଭାବରୁ କେନ୍ଦୁଝର ଜିଲ୍ଲାରେ ମରୁଡି ସ୍ଥିତି । ଜିଲ୍ଲାର 13ଟି ବ୍ଲକରୁ 10ଟି ବ୍ଲକରେ ଏଭଳି ଅବସ୍ଥା । ତେବେ ଜଳସେଚନ ସୁବିଧା ନଥିବାରୁ ଚାଷୀ ମାନେ ବିଲକୁ କେବଳ ହଳ କରି ମୌସୁମୀକୁ ଅନାଇ ବସିଛନ୍ତି ।

ସେପଟେ ଜିଲ୍ଲା କୃଷି ବିଭାଗ ଏଥିପ୍ରତି ଚିନ୍ତିତ ନଥିବା ମନେ ହେଉଛି । ଜିଲ୍ଲାରେ ଡେରିରେ ତଳି ପକା ହୋଇଥିବାରୁ ଆସୁଥିବା ମୌସୁମୀ ବର୍ଷା ପରେ ଚାଷ କାର୍ଯ୍ୟ ସମ୍ପାଦନ ହେବ ବୋଲି କୃଷି ବିଭାଗ କହିଛି ।

କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ