କେନ୍ଦୁଝର: ଏବେ ବିଦେଶୀ ଚାଖିବେ କେନ୍ଦୁଝର ବଡି଼ । ରାଜ୍ୟସରକାରଙ୍କ ୱାନ ଡିଷ୍ଟ୍ରିକ୍ଟ୍ ୱାନ ପ୍ରଡକ୍ଟ ସ୍କିମରେ ଏହା ସାମିଲ ହେବା ପରେ ବଢିଛି ଜିଲ୍ଲାବାସୀଙ୍କ ଉତ୍କଣ୍ଠା । ଘରୋଇ ବଜାରରେ ହଇଚଇ ସୃଷ୍ଟି କରିଥିବା କେନ୍ଦୁଝର ବଡି଼ ଏବେ ଆନ୍ତର୍ଜାତିକ ବଜାରରେ ଉପଲବ୍ଧ ହେବ ।
କେନ୍ଦୁଝରର ପ୍ରସିଦ୍ଧ ବଡି଼ । ଦେଖିବାକୁ ଯେମିତି ମନଲୋଭା, ସେମିତି ସ୍ବାଦିଷ୍ଟ ବି । ଘରୋଇ ବଜାରରେ ଏହାର ବେଶ ଚାହିଦା ରହିଛି । ହେଲେ ଏବେ ଏହି ବଡି ଆନ୍ତର୍ଜାତିକ ବଜାରରେ ଉପଲବ୍ଧ ହେବ । ସମସ୍ତେ ଏହାର ସ୍ବାଦ ପାଇବେ ।
ରାଜ୍ୟସରକାରଙ୍କ ୱାନ ଡିଷ୍ଟ୍ରିକ୍ଟ୍ ୱାନ ପ୍ରଡକ୍ଟ ସ୍କିମରେ ଏହା ସାମିଲ ହୋଇଛି । କୃଷି ବିଭାଗ, ମିଶନ ଶକ୍ତି ଓ ଜିଲ୍ଲା ଶିଳ୍ପ କେନ୍ଦ୍ର ମିଳିତ ସହଯୋଗରେ ବଡି଼ ପ୍ରସ୍ତୁତ କରାଯାଇ ବିକ୍ରି କରାଯିବ । ଏଥିପାଇଁ ସରକାର ସ୍ବୟଂ ସହାୟକ ଗୋଷ୍ଠୀଙ୍କୁ ମଧ୍ୟ ସହାୟତା ଯୋଗାଇ ଦେବେ । ଜିଲ୍ଲାକୁ ତିରିଶ ଲକ୍ଷ ଟଙ୍କାର ସବସିଡି ଅନୁଦାନ ସରକାର ପ୍ରଦାନ କରିବେ । ଯାହା ଏସଏଚଜିଙ୍କୁ ଦିଆଯିବ ।
ଏହି ସ୍କିମ୍ ପାଞ୍ଚବର୍ଷିଆ ହୋଇଥିବାବେଳେ ଏହାକୁ ବିକ୍ରି କରିବା ପାଇଁ ଭୁବନେଶ୍ବରରେ ପ୍ରଥମ କରି ରପ୍ତାନୀ ଭବନ ନିର୍ମାଣ କରାଯିବ । ତେବେ ସରକାରଙ୍କ ଏହି ଯୋଜନା ଫଳରେ କେନ୍ଦୁଝର ବଡି ଆହୁରି ପ୍ରସିଦ୍ଧି ଲାଭ କରିବ ବୋଲି ଆଶା କରାଯାଉଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ