ହାଣ୍ଡିଭଙ୍ଗାରେ ଜଙ୍ଗଲୀ ଦନ୍ତାର ତାଣ୍ଡବଲୀଳା

କେନ୍ଦୁଝର ଜିଲ୍ଲା ଯୋଡ଼ା ବ୍ଲକ ଅନ୍ତର୍ଗତ ବଡ଼କାଳିମାଟି ପଞ୍ଚାୟତରେ ଥିବା ହାଣ୍ଡିଭଙ୍ଗା ଗାଁରେ ଜଙ୍ଗଲୀ ଦନ୍ତାହାତୀ ଆତଙ୍କ ଦେଖିବାକୁ ମିଳିଛି।

କେନ୍ଦୁଝର: ଜିଲ୍ଲାର ଯୋଡା ବ୍ଲକ ଅଧିନସ୍ଥ ବଡକାଳିମାଟି ପଞ୍ଚାୟତର ହାଣ୍ଡିଭଙ୍ଗା ଗାଁରେ ଜଙ୍ଗଲୀ ଦନ୍ତାହାତୀର ତାଣ୍ଡବ ଲୀଳା ଦେଖିବାକୁ ମିଳିଛି। ଶୁକ୍ରବାର ଭୋର୍ ସମୟ ପ୍ରାୟ 5ଟାରେ ଏକ ଜଙ୍ଗଲୀ ଗୋଠ ଛଡା ଦନ୍ତାହାତୀ ଦୁବୁନାର ଓଏମସି ଖଣି ପଟୁ ଆସି ହାଣ୍ଡିଭଙ୍ଗା ଗାଁରେ ପଶିଥିଲା। ଏହାପରେ ଗାଁର ନଟ ବାରିକଙ୍କ ଢ଼ିଙ୍କି ଥିବା ଘରେ ପଶି ଦୁଇ ବୋରା ଧାନ ଖାଇବା ସହ ତାଙ୍କ ବଗିଚାରେ ଥିବା ଆଖୁ ଓ ପାଳଙ୍ଗ ଶାଗକୁ ମାଡି ଦଳିଦେଇଛି।

ଏହା ପରେ ହାତୀ ସିଧା ଗାଁ ପାଖରେ ଥିବା ସିଲିଯୋଡାର ରୁଙ୍ଗଟା ଖଣି ଦେଇ ଗୁରୁଡା ପଟେ ଯାଇଥିବାର ଦେଖିବାକୁ ମିଳିଛି। ସ୍ଥାନୀୟ ଲୋକଙ୍କ କହିବା ଅନୁସାରେ ଅତ୍ୟଧିକ ମାତ୍ରାରେ ଖଣି କମ୍ପାନୀ ହାତୀ ରହୁଥିବା ଜଙ୍ଗଲକୁ କାଟି ସଫା କରିଦେବା ଓ ଖଣି ଖନନ ହେବା ଯୋଗୁଁ ବିଭିନ୍ନ ବନ୍ୟଜନ୍ତୁ ଏବେ ଜନବସତି ମୁହାଁ ହେଉଛନ୍ତି। ଯାହାଫଳରେ ଜନସାଧାରଣ ଆତଙ୍କିତ ହୋଇପଡୁଛନ୍ତି।

କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ