କେନ୍ଦୁଝର: ଚମ୍ପୁଆ ରେଞ୍ଜରେ କମିବାର ନାଁ ଧରୁ ନାହିଁ ହାତୀ ଆତଙ୍କ । ବର୍ଦ୍ଧନା ଜଙ୍ଗଲରେ ଡେରା ପକାଇଛନ୍ତି ୨୨ ଟିକିଆ ଝାରଖଣ୍ଡୀ ହାତୀ ପଲ । ରବିବାର ବିଳମ୍ବିତ ରାତିରେ ହାତୀପଲ କରଞ୍ଜିଆ ରେଞ୍ଜରୁ ବୈତରଣୀ ନଦୀ ପାର ହୋଇ ନନ୍ଦପୁର ଗ୍ରାମକୁ ଧସେଇ ପସିଛନ୍ତି।
ନନ୍ଦପୁର ଗ୍ରାମର ଶ୍ରବଣ ମୁଣ୍ଡାଙ୍କ ଘର ଭାଙ୍ଗିବା ସହିତ ଧାନ ଚାଉଳ ଖାଇ ନଷ୍ଟ କରିଛନ୍ତି । ସେହିପରି ରାଧାକାନ୍ତ ମହାନ୍ତଙ୍କ ଘରର ପାଚେରୀ ଏବଂ ବରପଦା ଗ୍ରାମର ମିତ୍ରଭାନୁ ମହାନ୍ତଙ୍କ କୋବି ବାଡ଼ି ନଷ୍ଟ କରିଛନ୍ତି । ଏହାସହ ଗାଁର ସହଦେବ ମୁଣ୍ଡାଙ୍କ ପରିବା ଓ ଧାନ ଚାଷ ନଷ୍ଟ କରିଦେଇଛନ୍ତି ହାତୀପଲ । ହାତୀପଲକୁ ଦେଖି ଲୋକେ ଭୟଭୀତ ହୋଇ ପଡ଼ିଛନ୍ତି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
