ଘର ଭାଙ୍ଗିବା ସହ ଏକର ଏକର ଧାନ ଫସଲ ନଷ୍ଟ କଲେ ହାତୀପଲ

କେନ୍ଦୁଝର ଜିଲ୍ଲାର କମଳାଙ୍ଗ ଗାଁରେ ୮ ଟିକିଆ ହାତୀପଲଙ୍କ ଉପଦ୍ରବ ଜାରି ରହିଛି । ଗତକାଲି ବିଳମ୍ବିତ ରାତିରେ ଗାଁରେ ପଶି ସଜନୀ ପଲେଇ ଓ ଭମର ପଲେଇଙ୍କ ଘର ଭାଙ୍ଗିବା ସହ ୭ ବସ୍ତା ଧାନ ଖାଇଯାଇଛନ୍ତି ।

କେନ୍ଦୁଝର: ଜିଲ୍ଲାର କମଳାଙ୍ଗ ଗାଁରେ ୮ ଟିକିଆ ହାତୀପଲଙ୍କ ଉପଦ୍ରବ ଜାରି ରହିଛି । ହାତୀ ପଲରେ ୪ ଛୁଆହାତୀ ମଧ୍ୟ ଥିବା ଜଣାପଡିଛି । ତେବେ ଏହି ହାତୀପଲ ଗତକାଲି ବିଳମ୍ବିତ ରାତିରେ ଗାଁରେ ପଶି ସଜନୀ ପଲେଇ ଓ ଭମର ପଲେଇଙ୍କ ଘର ଭାଙ୍ଗିବା ସହ ୭ ବସ୍ତା ଧାନ ଖାଇଯାଇଛନ୍ତି । ଘର ବାହାରେ ଥିବା ସାଇକେଲକୁ ମଧ୍ୟ ସେମାନେ ଭାଙ୍ଗି ଦେଇଛନ୍ତି । ତେବେ ଘର ଲୋକଙ୍କ ପାଟି ଶୁଣି ଗ୍ରାମବାସୀ ସେଠାରେ ପହଞ୍ଚି ହାତୀ ପଲଙ୍କୁ ଘଉଡାଇଥିଲେ ।

ସେପଟେ ଗାଁ ପାଖ ଜଙ୍ଗଲରେ ହାତୀପଲ ଥିବାରୁ ଲୋକେ ଭୟଭୀତ ଅବସ୍ଥାରେ ଅଛନ୍ତି । ଗାଁ ଲୋକଙ୍କ ଏକର ଏକର ଧାନଫସଲ ଖାଇବା ସହ ଦଳି ମକଚି ଫସଲ ନଷ୍ଟ କରିଛନ୍ତି ହାତୀପଲ । ଚାଷୀ ଧାରକରଜ ଓ ଋଣ କରି ଚାଷ କରିଥିବା ଫସଲ ଏବେ ହାତୀଙ୍କ ଯୋଗୁଁ ନଷ୍ଟ ହେବାକୁ ବସିଲାଣି । ଯାହାକୁ ନେଇ ଚିନ୍ତାରେ ଗ୍ରାମବାସୀ । ତେବେ କ୍ଷତିଗ୍ରସ୍ତ ଲୋକଙ୍କୁ କ୍ଷତିପୂରଣ ଯୋଗାଇ ଦେଵାପାଇଁ ଗ୍ରାମବାସୀ ଦାବି କରିଛନ୍ତି ।

କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ