କେନ୍ଦୁଝର: କେନ୍ଦୁଝରଗଡ ପୌରପାଳିକା ପକ୍ଷରୁ ମଇଳା ଆବର୍ଜନା ପରିଚାଳନା ପ୍ରକଳ୍ପକୁ ପୁରୁଣା ସହରର ବସଷ୍ଟାଣ୍ଡ ନିକଟରେ ପ୍ରତିଷ୍ଠା କରାଯିବା ନିଷ୍ପତ୍ତିକୁ ନେଇ ଦେଖାଦେଇଛି ବିବାଦ । ଏନେଇ ସ୍ଥାନୀୟ ଲୋକେ ନିର୍ବାହୀ ଅଧିକାରୀ ନିରଞ୍ଜନ ଜେନାଙ୍କୁ ଲିଖିତ ଦାବିପତ୍ର ଦେଇ ସେଠାରେ ପ୍ରକଳ୍ପ ନ କରିବାକୁ କହିଛନ୍ତି। ସେଠାରେ ପ୍ରକଳ୍ପ ହେଲେ ବସଷ୍ଟାଣ୍ଡ ଓ ଏହା ଆଖପାଖ ସାହିବସ୍ତିର ପରିବେଶ ପ୍ରଦୂଷିତ ହେବ ବୋଲି ଲୋକେ ଦର୍ଶାଇଛନ୍ତି।
ବସଷ୍ଟାଣ୍ଡର ଉନ୍ନତୀକରଣ ପରିବର୍ତ୍ତେ ଏହାକୁ ଆବର୍ଜନା ସ୍ଥଳିରେ ପରିଣତ କରିବାକୁ ଉଦ୍ୟମ କରାଯାଉଛି ବୋଲି ଅଭିଯୋଗ ଆଣିଛନ୍ତି ଲୋକେ। ପ୍ରାୟ ୬ କୋଟି ଟଙ୍କା ବ୍ୟୟରେ ନିର୍ମାଣ ହୋଇଥିବା ବସଷ୍ଟାଣ୍ଡ ଏହା ଦ୍ବାରା କ୍ଷତିଗ୍ରସ୍ତ ହେବ ବୋଲି ଅଭିଯୋଗକାରୀ କହିଛନ୍ତି। ଅନ୍ୟପକ୍ଷେ ପ୍ରସ୍ତାବିତ ପ୍ରକଳ୍ପ ନିର୍ମାଣ ସ୍ଥାନରେ ଆଗରୁ ଟ୍ୟାକ୍ସି ଷ୍ଟାଣ୍ଡ ପ୍ରତିଷ୍ଠା ପାଇଁ ଯୋଜନା ରହିଥିଲା । ଏହି ଅଞ୍ଚଳରେ ମତ୍ସ୍ୟ ବିଭାଗ, ରେଶମ ବିଭାଗ କାର୍ଯ୍ୟାଳୟ ଥିବା ବେଳେ ପ୍ରାଣୀଧନ ଚିକିତ୍ସାଳୟ ସମେତ ପୁରାତନ ସିଦ୍ଧ ବଳଦେବଜୀଉ ମନ୍ଦିର ଓ ବହୁ ସଂଖ୍ୟାରେ ବସ୍ତି ରହିଛି । ଏଭଳି ପ୍ରକଳ୍ପ ହେଲେ ଏହି ସ୍ଥାନର ସୌନ୍ଦର୍ଯ୍ୟହାନୀ ହେବ ବୋଲି କହିଛନ୍ତି ସ୍ଥାନୀୟ ଲୋକେ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
TAGGED:
keonjhar old city busstand