କେନ୍ଦୁଝର: କୋରୋନା ଆକ୍ରାନ୍ତ ହୋଇଥିବାରୁ ମଲା ପରେ ମୃତଦେହକୁ ଛୁଇଁଲେନି ପରିବାର କି ସାହିଭାଇ । ଦୀର୍ଘ ୨୦ ଘଣ୍ଟା ଧରି ଘର ବାରଣ୍ଡାରେ ପଡ଼ି ରହିଲା ମୃତଦେହ । ଶେଷରେ ସ୍ବେଚ୍ଛାସେବୀମାନେ ପିପିଇ କିଟ୍ ପିନ୍ଧି ମୃତଦେହ ସତ୍କାର କରିଥିଲେ । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି କେନ୍ଦୁଝର ଜିଲ୍ଲା ବାଂଶପାଳ ବ୍ଲକ୍ ଶୁଆକାଟି ଅଞ୍ଚଳରେ ।
20 ଘଣ୍ଟାରୁ ଉର୍ଦ୍ଧ୍ବ ସମୟ ପଡି ରହିଲା ମୃତଦେହ, ସତ୍କାର କଲେ ସ୍ବେଚ୍ଛାସେବୀ
ଶୁଆକାଟିର ପ୍ରହଲ୍ଲାଦ ସେଠୀ କିଛିଦିନ ହେଲା ଅସୁସ୍ଥ ଥିବାବେଳେ କୋଭିଡ ପରୀକ୍ଷା କରିବାରୁ ତାଙ୍କ ରିପୋର୍ଟ ପଜିଟିଭ ଆସିଥିଲା । ସେ ଘରେ ସଂଗରୋଧରେ ଥିଲେ । କିନ୍ତୁ ଗତକାଲି(ଶୁକ୍ରବାର) ଅପରାହ୍ନରେ ତାଙ୍କର ମୃତ୍ୟୁ ଘଟିଥିଲା । ହେଲେ ଗାଁ ଲୋକ ସତ୍କାର ପାଇଁ ଆସିଲେ ନାହିଁ । ଏପରିକି ପରିବାର ଲୋକ ମଧ୍ୟ ଭୟରେ ଛୁଇଁ ନଥିଲେ । ପ୍ରଶାସନ ପାଖରେ ଖବର ପହଞ୍ଚିଥିଲେ ସୁଦ୍ଧା ପ୍ରଶାସନିକ ଅଧିକାରୀମାନେ ଚେଷ୍ଟା କରି ମଧ୍ୟ ବିଫଳ ହୋଇଥିଲେ ।