କେନ୍ଦୁଝର: ସହରସ୍ଥିତ ମାଇନିଂ ଇଞ୍ଜିନିୟରିଂ ସ୍କୁଲ ପରିସରରେ ଚଳିତ ନିର୍ବାଚନ ପାଇଁ ଗଠିତ ହୋଇଥିବା ଷ୍ଟ୍ରଙ୍ଗରୁମର ସୁରକ୍ଷାକୁ ନେଇ କେନ୍ଦୁଝର ଜିଲ୍ଲାପାଳଙ୍କ କାର୍ଯ୍ୟାଳୟ ଘେରିଛି ବିଜେପି । ଗତକାଲି ରାତିରେ ଏଠାରୁ ଜଣେ ସଦିଗ୍ଧ ବ୍ୟକ୍ତିଙ୍କୁ ସ୍ଥାନୀୟ ବିଜେପି କର୍ମୀ ଧରିବା ଘଟଣା ଚାଞ୍ଚଲ୍ୟ ସୃଷ୍ଟି କରିଛି।
ଏନେଇ ଦଳ ପକ୍ଷରୁ କୁହାଯାଇଛି ଷ୍ଟ୍ରଙ୍ଗରୁମ ନିକଟରୁ ଧରାପଡିଥିବା ବ୍ୟକ୍ତି ଜଣକ ଜଣେ ଖଣି ବ୍ୟବସାୟୀ ଓ ପେସାରେ ସଷ୍ଟୱୟାର ଇଞ୍ଜିନିୟର । ବିନା ଅନୁମତିରେ ଜଣେ ସାଧାରଣ ଲୋକ ଷ୍ଟ୍ରଙ୍ଗରୁମ ନିକଟକୁ ଯାଇ ପାରୁନଥିବା ବେଳେ, ବିଳମ୍ବିତ ରାତିରେ ଇଞ୍ଜିନିୟର ଜଣକ କଣ କରୁଥିଲେ ବୋଲି ବିଜେପି ପ୍ରଶ୍ନ କରିଛି । ଏହାର ପ୍ରତିବାଦରେ ଦଳର ଶତାଧିକ କର୍ମୀ ଜିଲ୍ଲାପାଳଙ୍କ କାର୍ଯ୍ୟାଳୟ ଘେରାଉ କରିଥିଲେ ।
ପରେ ଏକ ପ୍ରତିନିଧି ଦଳ ଜିଲ୍ଲାପାଳଙ୍କୁ ଭେଟିଥିଲା । ଏହାର ପ୍ରତିକ୍ରିୟା ରଖିଛନ୍ତି କେନ୍ଦୁଝର ଜିଲ୍ଲାପାଳ । ଷ୍ଟ୍ରଙ୍ଗରୁମର ସୁରକ୍ଷାକୁ ନେଇ ଆସିଥିବା ଅଭିଯୋଗକୁ ଖଣ୍ଡନ କରିବା ସହ ଏଥିପାଇଁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିବା ସେ ପ୍ରକାଶ କରିଛନ୍ତି । ଏଥିସହିତ ଜିଲ୍ଲାପାଳ ଆହୁରି ମଧ୍ୟ କହିଛନ୍ତି ଷ୍ଟ୍ରଙ୍ଗରୁମର ସୁରକ୍ଷା ଦାୟିତ୍ବରେ କେନ୍ଦ୍ରୀୟ ଅର୍ଦ୍ଧ ସାମରିକ ବଳର ଯବାନଙ୍କୁ ନିୟୋଜିତ କରାଯାଇଥାଏ ।