କେନ୍ଦୁଝରରେ ବସ ଓଲଟି ୧୦ରୁ ଉର୍ଦ୍ଧ୍ବ ଆହତ

ଭୁବନେଶ୍ଵରରୁ ଯାଉଥିବା ଘରୋଇ ବସ ଓଲଟି ୧୦ରୁ ଉର୍ଦ୍ଧ୍ବ ଯାତ୍ରୀ ଆହତ। ଘଟଣାସ୍ଥଳରେ ପୋଲିସ ପହଞ୍ଚି ଆହତଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଛି ।

କେନ୍ଦୁଝର: ବସ ଓଲଟି ୧୦ ରୁ ଉର୍ଦ୍ଧ୍ବ ଯାତ୍ରୀ ଆହତ। ଗତକାଲି ରାତି ପ୍ରାୟ 2ଟାରେ ବସଟି ଓଲଟିବା ପରେ ଘଟଣା ସ୍ଥଳରୁ ବସ କର୍ମଚାରୀ ମାନେ ଫେରାର ହୋଇ ଯାଇଛନ୍ତି । ଘଟଣାସ୍ଥଳରେ ପୋଲିସ ପହଞ୍ଚି ଆହତଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଛି ।

ସୂଚନା ଅନୁଯାୟୀ ଗତକାଲି ରାତିରେ କେନ୍ଦୁଝର ଜିଲ୍ଲା କୋଇଡାରୁ ଭୁବନେଶ୍ଵର ଯାଉଥିବା ସଂସ୍କାର ନାମକ ଏକ ଘରୋଇ ଯାତ୍ରୀବାହୀ ବସ ଭାରସାମ୍ୟ ହରାଇ ଚମ୍ପୁଆ ଥାନା ଅନ୍ତର୍ଗତ ପର୍ଶଳା ନିକଟରେ ଓଲଟି ଯାଇଥିଲା । ଫଳରେ ସ୍ଥାନୀୟ କିଛି ଲୋକଙ୍କ ସହାୟତାରେ ଯାତ୍ରୀ ମାନେ ବହୁ କଷ୍ଟରେ ଭିତରୁ ବାହାରକୁ ଆସିଥିଲେ । ଖବର ପାଇ ରିମୁଳି ଫାଣ୍ଡି ଅଧିକାରୀ ଓ ୧୦୮ ଆମ୍ବୁଲାନ୍ସ ଘଟଣା ସ୍ଥଳରେ ପହଞ୍ଚି ୧୦ ରୁ ଉର୍ଦ୍ଧ୍ବ ଆହାତକୁ ଉଦ୍ଧାର କରି ଚମ୍ପୁଆ ଡାକ୍ତରଖାନାରେ ଭର୍ତ୍ତି କରିଥିଲେ । ପୋଲିସ ଯାତ୍ରୀ ମାନଙ୍କୁ ପଚରା ଉଚୁରା କରି ତଦନ୍ତ ଜାରି ରଖିଛି ।

କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ