କେନ୍ଦୁଝର: ବଣ ଜଙ୍ଗଲ ପାହାଡ଼ ଭରା କେନ୍ଦୁଝର ଜିଲ୍ଲା । ଏହି ଜଙ୍ଗଲ ପାହାଡ଼ ମଧ୍ୟରେ ଅପରୂପ ପ୍ରାକୃତିକ ସୌନ୍ଦର୍ଯ୍ୟ ଭରି ରହିଛି । ଅପରୂପ ସୋନ୍ଦର୍ଯ୍ୟ ସହ ଜିଲ୍ଲାର କୋଣ ଅନୁକୋଣରେ ପ୍ରାକୃତିକ ଜଳପ୍ରପାତ ମଧ୍ୟ ଅହରହ ବହି ଚାଲିଛି । ଜିଲ୍ଲାରେ ବହିଯାଇଥିବା ପ୍ରାକୃତିକ ଝରଣା ଗୁଡିକ ମଧ୍ୟରେ ବଡ଼ଘାଗରା ଜଳପ୍ରପାତ ଅନ୍ୟତମ । କାହିଁ କେଉଁ କାଳରୁ ମାଛକାନ୍ଦଣା ନଦୀରୁ ପାହାଡ଼ ବୁକୁ ଚିରି ଏହି ଜଳପ୍ରପାତ ବହି ଚାଲିଛି । ପ୍ରଶାସନିକ ଦୂରଦୃଷ୍ଟି ଅଭାବରୁ ଏହି ପର୍ଯ୍ୟଟନ ସ୍ଥଳୀ ଏକ ରକମର ଦୃଷ୍ଟି ଆଡୁଆଳରେ ରହିଯାଇଥିଲା । କିନ୍ତୁ ବର୍ତ୍ତମାନ ସରକାରଙ୍କ ପର୍ଯ୍ୟଟନ ବିକାଶ ପାଇଁ ପର୍ଯ୍ୟଟନ ସ୍ଥଳୀ ଲୋକଲୋଚନକୁ ଆସିବାକୁ ଯାଉଛି ।
କେନ୍ଦୁଝର ସହରରୁ ମାତ୍ର ୧୦ କିମି ଦୂରରେ ବଡ଼ଘାଗରା ଜଳପ୍ରପାତ ଅବସ୍ଥିତ । ଜିଲ୍ଲାର ଜଳପ୍ରପାତ ମଧ୍ୟରେ ସାନଘାଗରା ଜଳପ୍ରପାତ ପର୍ଯ୍ୟଟନର କେନ୍ଦ୍ରବିନ୍ଦୁ ପାଲିଟି ଥିବା ବେଳେ ସେଠାରୁ ମାତ୍ର 5 କିଲୋମିଟର ଦୂରରେ ବଡ଼ ଘାଗରା ଜଳପ୍ରପାତ ଅବସ୍ଥିତ । ରାଜ୍ୟ ସରକାରଙ୍କ ପର୍ଯ୍ୟଟନ ବିଭାଗ ପକ୍ଷରୁ ଏହାର ପୁନଃରୁଦ୍ଧାର ପାଇଁ ପ୍ରାୟ ସାଢେ ଚାରି କୋଟିରୁ ଊର୍ଦ୍ଧ୍ବ ଟଙ୍କାର କାର୍ଯ୍ୟ ଜାରି ରହିଛି । ଏହି ଆଧାରରେ ପର୍ଯ୍ୟଟନ ସ୍ଥଳୀକୁ ପହଞ୍ଚିବା ପାଇଁ ମୁଖ୍ୟ ରାସ୍ତାର ବିକାଶ କାର୍ଯ୍ୟ ସରି ଯାଇଛି । ଏହାସହ ବଡ଼ଘାଗରା ଜଳପ୍ରପାତ ସମ୍ମୁଖରେ ଝରଣା ନିକଟବର୍ତ୍ତୀ ହେବା ପାଇଁ ଜେଟି ନିର୍ମାଣ କରାଯାଇଛି । ଏଠାକୁ ଯିବା ଆସିବା ପାଇଁ ନୂତନ ଭାବେ କାରୁକାର୍ଯ୍ୟ ଭରା ପାହାଚ ନିର୍ମାଣ କରାଯାଇଛି । ପର୍ଯ୍ୟଟକଙ୍କ ବିଶ୍ରାମ ପାଇଁ ଖୋଲା ବିଶ୍ରାମଗାର ମଧ୍ୟ ନିର୍ମାଣ କରାଯାଇଛି ।
ଏହା ମଧ୍ୟ ପଢ଼ନ୍ତୁ:କାଇଯୋଡା ଜଳପ୍ରପାତ: 150ଫୁଟ୍ ଉଚ୍ଚରୁ ଝରୁଛି ଜଳ, ମନମୋହୁଛି ଅପରୂପ ସୌନ୍ଦର୍ଯ୍ୟ, ଜମୁଛି ପର୍ଯ୍ୟଟକଙ୍କ ଭିଡ