କେନ୍ଦୁଝର: ଘରର ରୋଜଗାର ମେଣ୍ଟାଇବା ପାଇଁ ଅଣ୍ଟା ଭିଡିଛନ୍ତି ଆଦିବାସୀ ମହିଳା । ତେଲ ଲୁଣର ସଂସାର ଚଳାଇବାକୁ ପୁରୁଷଙ୍କ ସହ ବାହାରକୁ କାଢିଛନ୍ତି ପାଦ । ବିଭିନ୍ନ ନଦୀ, ପୋଖରୀ ବନ୍ଧରୁ ଖଜୁରୀ ପତ୍ର ତୋଳିବା କଷ୍ଟକର । ହେଲେ ଏହା ଏମାନଙ୍କ ପାଇଁ ସବୁଦିନିଆ କାମ । ଏହାକୁ ଶୁଖାଇ ଏଥିରୁ ବୁଣନ୍ତି ପଟି । 2ରୁ 3 ଜଣ ମହିଳା ମିଶିଲେ ତିଆରି ହୁଏ 3ରୁ ଅଧିକ ପଟି । ଦୈନିକ ହାଟ କିମ୍ବା ଗ୍ରାମକୁ ଆସୁଥିବା ବେପାରୀକୁ ପଟି ବିକି କରନ୍ତି ରୋଜଗାର ।
ଆଦିବାସୀ ମହିଳାଙ୍କ ଦୁଃଖ: ବୁଣୁଛନ୍ତି ପଟି, କିଣିବାକୁ ନାହାନ୍ତି ବେପାରୀ
କିନ୍ତୁ ଲକଡାଉନ ଏମାନଙ୍କ ରୋଜଗାରରେ ସାଜିଛି ବାଧା । ଆସୁନାହାନ୍ତି ବେପାରୀ । ହାଟକୁ ବି ଯିବା ଅସମ୍ଭବ । କେବଳ ଘରେ ବସି ବୁଣୁଛନ୍ତି ପଟି । ଟଙ୍କା ମିଳିବା ଦୂର କଥା । ପଟି ଦେଇ ଖାଇବା ପାଇଁ ଚାଉଳ ଗଣ୍ଡେ ମିଳିବା ବଡ କଥା ବୋଲି ଦୁଃଖର ସହ କହିଛନ୍ତି ଆଦିବାସୀ ମହିଳା । ଏମାନେ ହେଉଛନ୍ତି କେନ୍ଦୁଝର ସଦର ବ୍ଲକ ଅନ୍ତର୍ଗତ ମହାଦେଇଯୋଡା ପଞ୍ଚାୟତ ମଦରଙ୍ଗାଯୋଡି ଗ୍ରାମର ୩୦ରୁ ଉର୍ଦ୍ଧ୍ବ ଆଦିବାସୀ ପରିବାର ।