କେନ୍ଦ୍ରାପଡ଼ା:ହକ ପାଇଁ ଶାଶୁଘର ଆଗରେ ଧାରଣାରେ ବସି ରହିଛନ୍ତି ବୋହୂ । ଘଟଣାଟି ଦେଖିବାକୁ ମିଳିଛି କେନ୍ଦ୍ରାପଡ଼ା ଡେରାବିଶ୍ ଥାନା ଅଞ୍ଚଳରେ । ମାନସିକ ବିକାରଗସ୍ତ ଦର୍ଶାଇ ବୋହୂକୁ ଘରୁ କାଢି ଦେଇଥିବା ଅଭିଯୋଗ । ଶାଶୁଘର ଲୋକେ ସ୍ୱୀକାର ନକଲେ ସେ ଆତ୍ମହତ୍ୟା କରିବେ ବୋଲି କହିଛନ୍ତି ।
ଅଭିଯୋଗ ଅନୁଯାୟୀ, ଡେରାବିଶ୍ ଥାନା ଅଧିନ ଦୁମୁକାହାଟ ଗାଁର ସ୍ବର୍ଗତ ବିଶ୍ୱନାଥ ନାୟକଙ୍କ ଝିଅ ସୋନାଲି ମଇଁଷିପୁର ଗାଁର କୈଳାସ ସାମଲଙ୍କ ପୁଅ ସୁବାଷ ସାମଲଙ୍କୁ ଚଳିତବର୍ଷ ଜୁଲାଇ ମାସରେ ବିବାହ କରିଥିଲେ । ବିବାହର ଏକମାସ ନପୂରୁଣୁ ସୋନାଲି ମାନସିକ ବିକାରଗସ୍ତ ଥିବା ଦର୍ଶାଇ ତାଙ୍କୁ ଶାଶୁଘର ଲୋକେ ପଞ୍ଚାୟତରେ ବୈଠକ କରି ବାପଘରକୁ ପଠାଇ ଦେଇଥିଲେ । ଦୁଇମାସ ମଧ୍ୟରେ ପୁନଃ ଫେରାଇ ଆଣିବେ ବୋଲି ପଞ୍ଚାୟତ ପତ୍ରରେ ଲେଖା ଯାଇଥିଲା । ତେବେ ଦୁଇମାସ ପୁରି ତିନିମାସ ଚାଲୁଥିବା ବେଳେ ସୋନାଲିଙ୍କ ପରିବାର ଲୋକେ ତାଙ୍କୁ ପଠାଇବା ପାଇଁ ଶାଶୁଘର ଲୋକଙ୍କୁ ଯୋଗାଯୋଗ କରିଥିଲେ । ମାତ୍ର ଯୌତୁକ ବାବଦକୁ 5 ଲକ୍ଷ ଟଙ୍କା ଦେଲେ ମାନସିକ ବିକୃତ ଝିଅକୁ ଘରେ ରଖିବେ ବୋଲି ଶାଶୁଘର ଲୋକେ କହିଥିଲେ ।