କେନ୍ଦ୍ରାପଡା: ପ୍ରଥମେ କୋରୋନା ଜନିତ ଲକଡାଉନ କଟକଣା ଆଉ ପରେ ମହାବାତ୍ୟା ଅମ୍ଫାନ, ଗୋଟିଏ ପରେ ଗୋଟିଏ ବିପତ୍ତି ଦାଉ ସାଜୁଛି ଏମାନଙ୍କ ଭାଗ୍ୟ ଉପରେ । ନା ମୁଣ୍ଡ ଗୁଞ୍ଜିବାକୁ ଅଛି ଘର ନା ଖାଇବାକୁ ଦି ମୁଠା ଦାନା ମିଳୁଛି ଏମାନଙ୍କୁ । ସମାଜ ଏମାନଙ୍କୁ ଆଡ଼ ଆଖିରେ ଦେଖିଥାଏ କାରଣ ଏମାନେ ହେଉଛନ୍ତି କିନ୍ନର । ଘର ପରିବାର ଏମାନଙ୍କୁ ଦୁରେଇ ଦେଇଥିବାରୁ ଭିକ୍ଷାବୃତ୍ତି ହିଁ ଏମାନଙ୍କ ଏକମାତ୍ର ଭରଷା। ପ୍ରଥମେ ଟ୍ରେନରେ ଭିକ୍ଷାବୃତ୍ତି କରି ଯେଣେତେଣ ପ୍ରକାରେ ଚଳିଯାଉଥିଲେ ମଧ୍ୟ ଭାରତୀୟ ରେଳ ବିଭାଗ ପକ୍ଷରୁ ଟ୍ରେନରେ ଭିକ୍ଷାବୃତ୍ତି ନିଷିଦ୍ଧ ହେବା ପରେ ବିଭିନ୍ନ ଦୋକାନ ଓ ବଜାରରୁ ଆଦାୟ କରି ଏମାନଙ୍କର ଦିନ କଟୁଥିଲା ।
କିନ୍ନରଙ୍କ ଦୁଃଖ: ରୋଜଗାର ରୋକିଛି ଲକଡାଉନ, ଘର ଛଡାଇଛି ଅମ୍ଫାନ ହେଲେ ଏବେ କୋଭିଡ-19 ପାଇଁ ଲକଡାଉନ ହେବା ପରେ ବ୍ୟାବସାୟିକ ପ୍ରତିଷ୍ଠାନ ଓ ବଜାର ବନ୍ଦ ହେବାରୁ ଟଙ୍କାଟିଏ ମଧ୍ୟ ଆୟ କରିପାରୁ ନାହାନ୍ତି କିନ୍ନର ସଂଘ । ଲକଡାଉନ ପୂର୍ବରୁ ସଂଘ ସଭାପତି ଏଲିନା ଦାସ ସହରରେ ଏକ ଘରଭଡା ନେଇଥିଲେ । ସେଠାକୁ ତାଙ୍କର ସାଥିମାନେ ଯିବା ଆସିବା ଆରମ୍ଭ କରିବାରୁ ଘର ମାଲିକ ତାଙ୍କୁ ଘର ଛାଡିବା ପାଇଁ କହିଥିଲେ । ବେଘର ହୋଇ ଏଣେତେଣେ ବୁଲି ଶେଷରେ ସ୍ଥାନୀୟ ମର୍ଡରପୁର ଅଞ୍ଚଳର ଚକ୍ରଧର ମଳିକଙ୍କୁ ଭେଟି ଅନୁରୋଧ କରିବା ପରେ ସେ 5ନଂ(କ)ଜାତୀୟ ରାଜପଥ ପାର୍ଶ୍ଵର ଶ୍ୟାମସୁନ୍ଦରପୁର-କଜଳା ରାସ୍ତାର ଏକ ମଠରେ ଭଙ୍ଗା ଚାଳ ଛପର ଘରେ ଆଶ୍ରୟ ନେଇଥିଲେ । ଏକା ନୁହେଁ ବରଂ ସାଥୀ 10ରୁ ଉର୍ଦ୍ଧ୍ବ କିନ୍ନରଙ୍କୁ ମଧ୍ୟ ସେ ରହିବା ପାଇଁ ଆଶ୍ରୟ ଯୋଗାଇଥିଲେ ।
ଦୁଇ ଓଳି ଖାଇବାକୁ ସଂଗ୍ରାମ କରୁଥିବା ଏମାନଙ୍କ ପାଖରେ ନା ପହଞ୍ଚି ପାରିଛି ପ୍ରଶାସନ ନା ଖାଦ୍ୟ ସଂଗ୍ରହ କରିବାକୁ ସମର୍ଥ ହୋଇଛନ୍ତି ଏମାନେ । କିଛି ସ୍ବେଛାସେବୀ ସଙ୍ଗଠନ ଏମାନଙ୍କୁ ଖାଦ୍ୟ ସାମଗ୍ରୀ ଯୋଗାଇ ଦେବା ପରେ ନିଜ ଜୀବନକୁ ବଞ୍ଚାଇବାରେ କିଛି ମାତ୍ରାରେ ସମର୍ଥ ହୋଇଛନ୍ତି ଏହି କିନ୍ନରମାନେ । ଅନ୍ୟପଟେ ଅମ୍ଫାନ ବାତ୍ୟାରେ ରହୁଥିବା ଘରର କାନ୍ଥ ଭୁଷୁଡି ପଡି ବଦଳିଛି ଘରର ନକ୍ସା । ଆଉ ବାତ୍ୟା ଛାଡିବା ପରେ ଉଡି ଯାଇଥିବା ଦସ୍ତା ଓ ଦରି ସଂଗ୍ରହ କରି ଏମାନେ ଘରକୁ ସଜାଡିଛନ୍ତି । ତେବେ 17ଜଣ କିନ୍ନରଙ୍କୁ ନେଇ ଶ୍ରୀ ଶ୍ରୀ ବଳଦେବଜୀଉ କିନ୍ନର ସଂଘ ଗଠନ କରି ଏମାନେ ସରକାରଙ୍କ ଦୃଷ୍ଟି ଆକର୍ଷଣ କରୁଥିଲେ ମଧ୍ୟ ଏମାନଙ୍କ କଥାକୁ ପ୍ରଶାସନ କର୍ଣ୍ଣପାତ କରୁନଥିବା ଅଭିଯୋଗ କରିଛନ୍ତି ଏମାନେ ।
ସାମାଜିକ ବାସନ୍ଦ ସହିତ ସମାଲୋଚନା ଏମାନଙ୍କୁ ଗଭୀର ଆଘାତ ଦେଉଥିବା ବେଳେ ସରକାରୀସ୍ତରରେ ଅସହଯୋଗ ଏମାନଙ୍କ ବ୍ୟଥାକୁ ଦ୍ବିଗୁଣିତ କରିଛି । ସମସ୍ତ କିନ୍ନରଙ୍କୁ ରହିବାକୁ ଜାଗା, ପେଟକୁ ମୁଠାଏ ଦାନା ଓ ଆତ୍ମନିର୍ଭରଶୀଳ ହେବା ପାଇଁ ସରକାରୀ ସହାୟତା ପାଇଁ ଦାବି କରିଛନ୍ତି କିନ୍ନର ସଭାପତି । ଅନ୍ୟପଟେ ଏହି କିନ୍ନରମାନେ ପ୍ରଶାସନ ସହିତ କୌଣସି ଯୋଗାଯୋଗ କରିନାହାନ୍ତି । ଏମାନେ ଯୋଗାଯୋଗ କଲେ ନିଶ୍ଚୟ ପ୍ରଶାସନ ସେମାନଙ୍କ ସୁବିଧା ସୁଯୋଗ ଯୋଗାଇ ଦେବ ବୋଲି କହିଛନ୍ତି ଜିଲ୍ଲା ସାମାଜିକ ସୁରକ୍ଷା ଅଧିକାରୀ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
