କେନ୍ଦ୍ରାପଡା ମୁଖ୍ୟ ଚିକିତ୍ସାଳୟରୁ ଧରାପଡିଲେ ୭ ଦଲାଲ, ରୋଗୀ ବେଶରେ କାବୁକଲା ପୋଲିସ

କେନ୍ଦ୍ରାପଡା ଜିଲ୍ଲା ମୁଖ୍ୟ ଚିକିତ୍ସାଳୟରୁ ଧରାପଡିଲେ ୭ ଦଲାଲ । ଏମାନଙ୍କୁ ଟାଉନଥାନା ପୋଲିସ ସାଧା ପୋଷାକ ପିନ୍ଧି ଚତୁରତାର ସହିତ କାବୁ କରିବାରେ ସକ୍ଷମ ହୋଇଛି । ଅଧିକ ପଢନ୍ତୁ

କେନ୍ଦ୍ରାପଡା:ଜିଲ୍ଲାରେ ବ୍ରହ୍ମପୁରର ଫର୍ମୁଲା । ବ୍ରହ୍ମପୁର ଏମକେସିଜିରୁ ୭ ଜଣ ଦଲାଲ ପରେ ଏବେ କେନ୍ଦ୍ରାପଡାରୁ ସମାନ ଖବର ସାମ୍ନାକୁ ଆସିଛି । ଜିଲ୍ଲା ମୁଖ୍ୟ ଚିକିତ୍ସାଳୟରେ କିଛି ଦଲାଲ ରୋଗୀମାନଙ୍କୁ ପ୍ରଲୋଭନ ଦେଖାଉଥିବା ଖବର ସାମ୍ନାକୁ ଆସିଥିଲା । ତେବେ ଆଜି(ଗୁରୁବାର) ରୋଗୀ ବେଶରେ ଯାଇ ୭ ଜଣ ଦଲାଲଙ୍କୁ କାବୁ କରିଛି ଟାଉନଥାନା ପୋଲିସ । ରୋଗୀ ବେଶରେ ଯାଇ ଦଲାଲଙ୍କୁ ଧରିବାରେ ସକ୍ଷମ ହୋଇଛି ପୋଲିସ ।

ସୂଚନା ଅନୁସାରେ, ଜିଲ୍ଲା ମୁଖ୍ୟ ଚିକିତ୍ସାଳୟ ପରିସରରେ ଥିବା ବିଭିନ୍ନ ୱାର୍ଡରେ ଦଲାଲମାନେ ଦୂର ଦୁରାନ୍ତରୁ ଆସୁଥିବା ରୋଗୀ ଏବଂ ସମ୍ପର୍କୀୟମାନଙ୍କୁ ନାନା ପ୍ରକାରର ଚିକିତ୍ସା ଭୟ, ଡାକ୍ତର ଅଭାବ ଆଳ ଦେଖାଇ ଘରୋଇ ନର୍ସିଂହୋମ ଓ କ୍ଲିନିକକୁ ନେଉଥିଲେ । ତେବେ ଆଜି ଟାଉନଥାନା ପୋଲିସ ରୋଗୀ ବେଶରେ ହସ୍ପିଟାଲକୁ ଯାଇଥିଲେ । ରୋଗୀ ବେଶରେ ଯାଇ ପୋଲିସ ଦଲାଲ ମାନଙ୍କର ଗତିବିଧି ଲକ୍ଷ୍ୟ କରୁଥିବାବେଳେ କିଛି ପୋଲିସ କର୍ମଚାରୀ ରୋଗୀ ସମ୍ପର୍କୀୟ ହୋଇ ଏହି ଦଲାଲଙ୍କ ଠାରୁ ପ୍ରଥମେ ଚିକିତ୍ସା ସମ୍ପର୍କିତ ତଥ୍ୟ ଆଦାୟ କରି ସେଗୁଡିକୁ ରେକର୍ଡ଼ିଂ କରିଥିଲେ ।

ତେବେ ପୋଲିସର ଏହି ଚାଲ୍‌କୁ ବୁଝି ନପାରି ଦୀର୍ଘଦିନ ଧରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଦଲାଲି ଚଳାଇ ଆସୁଥିବା ଏହି ୭ ଜଣ ପୋଲିସ ପଞ୍ଝାରେ ଫସି ଯାଇଥିଲେ । ଗିରଫ ଅଭିଯୁକ୍ତମାନେ ହେଲେ ସ୍ବର୍ଣ୍ଣମୟୀ ସେଠୀ, ସସ୍ମିତା ବେହେରା, ସୁପ୍ରିୟା ନାୟକ, ଜୟନ୍ତୀ ସାହୁ, ଅବଧୂତ ରାଉତ, ମୁନା ବେହେରା ଓ ଶୁକଦେବ ମଲିକ । ଅଭିଯୁକ୍ତମାନଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଥିବା ନେଇ ଉପଖଣ୍ଡ ଆରକ୍ଷୀ ଅଧିକ୍ଷକ ଜୟନ୍ତ ମହାପାତ୍ର ସୂଚନା ଦେଇଛନ୍ତି । ଆଜି ଜିଲ୍ଲା ମୁଖ୍ୟ ଚିକିତ୍ସାଳୟର ନୂତନ ଗୃହ ଉଦ୍‌ଘାଟନ ହେବାକୁ ଥିବାବେଳେ ଏହାର ଠିକ ଆଗରୁ ପୋଲିସର ଏଭଳି ପଦକ୍ଷେପକୁ ସ୍ୱାଗତ କରାଯାଇଛି ।

ଏନେଇ କେନ୍ଦ୍ରାପଡା ଉପଖଣ୍ଡ ଆରକ୍ଷୀ ଅଧିକ୍ଷକ କହିଛନ୍ତି ଯେ, "କିଛି ଦଲାଲ ମୁଖ୍ୟ ଚିକିତ୍ସାଳୟରେ ପ୍ରଭାବ ବିସ୍ତାର କରି ରୋଗୀ ଏବଂ ସମ୍ପର୍କୀୟମାନଙ୍କୁ ନାନା ପ୍ରକାର ପ୍ରଲୋଭନ ଦେଖାଉଛନ୍ତି । ଯାହାଫଳରେ ସେମାନେ ଉପଯୁକ୍ତ ସେବା ପାଇପାରୁ ନାହାନ୍ତି । ଡାକ୍ତର ଅଭାବ ଆଳ ଦେଖାଇ ଘରୋଇ ନର୍ସିଂହୋମ ଓ କ୍ଲିନିକକୁ ନେଉଥିଲେ । ଏନେଇ ଟାଉନଥାନା ଆଇଆଇସିଙ୍କ ନିକଟରେ ଖବର ରହିଥିଲା । ଏହାପରେ ଏସଂକ୍ରନ୍ତରେ ଯୋଜନା କରାଯାଇ ରେଡ୍‌ କରାଯାଇଥିଲା । ୭ଜଣଙ୍କୁ ଗିରଫ କରାଯାଇଛି । ସେମାନଙ୍କ ମଧ୍ୟରୁ ୪ ଜଣ ମହିଳା ଓ ୩ ଜଣ ପୁରୁଷ ରହିଛନ୍ତି । ଅଭିଯୁକ୍ତମାନଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି ।"

ଇଟିଭି ଭାରତ, କେନ୍ଦ୍ରାପଡା