କେନ୍ଦ୍ରାପଡ଼ା: ପୌର ନିର୍ବାଚନ ନାମାଙ୍କନ ପତ୍ର ଦାଖଲ ପାଇଁ ହାତରେ ଆଉ ମାତ୍ର ଦୁଇଟା ଦିନ । କିନ୍ତୁ ଏଯାବତ ଓଡ଼ିଶାର ସର୍ବ ପୁରାତନ ଓ ପ୍ରଥମ ପୌରପାଳିକା କେନ୍ଦ୍ରାପଡ଼ାରେ ଶେଷ ହୋଇପାରୁନାହିଁ ପ୍ରାର୍ଥୀ ଚୟନ। ବିଜେଡି,ବିଜେପି ଓ କଂଗ୍ରେସ ଦଳ ପ୍ରାର୍ଥୀ ଚୟନ ପାଇଁ ଚିନ୍ତାରେ ରହିଥିବା ବେଳେ ୨୧ ୱାର୍ଡ ବିଶିଷ୍ଟ କେନ୍ଦ୍ରାପଡ଼ା ପୌରପାଳିକାର ଅଧ୍ୟକ୍ଷ ଆସନ କାହା ହାତକୁ ଯିବ ସେନେଇ ଏଯାବତ ଅନିଶ୍ଚିତ ତିନିଦଳ ।
ଆସନ୍ତା ସୋମବାର ଦିନ ନାମାଙ୍କନ ପତ୍ର ଦାଖଲ ଶେଷ ହେବାକୁ ରହିଥିବା ବେଳେ ଶାସକ ଦଳରୁ ଅନେକ ପ୍ରାର୍ଥୀ ଟିକେଟ ଆଶାୟୀ ରହିଛନ୍ତି । ତେବେ କାହାକୁ ଟିକେଟ ଦିଆଯିବ ସେନେଇ କେନ୍ଦ୍ରାପଡ଼ା ବିଧାୟକ ଓ ଦଳୀୟ ନେତୃବୃନ୍ଦ ଅଙ୍କକସା ଚଲାଇଥିବା କହିଛନ୍ତି ବିଜେଡି ନଗର ସଭାପତି। ସେହିପରି ବିଜେପି ପକ୍ଷରୁ ଟିକେଟ ଆଶାୟୀଙ୍କ ଲମ୍ବା ଲିଷ୍ଟ ରହିଛି । ଯାହା ଦଳ ପାଇଁ ମୁଣ୍ଡ ବିନ୍ଧାର କାରଣ ପାଲଟିଥିବା ବେଳେ କାହାକୁ ଦିଆଯିବ କାଉନସିଲର ଟିକେଟ ସେନେଇ ଏବେ ବିଜେପି ଶିବିର ପ୍ରସ୍ତୁତି ଚଳାଉଥିବା କହିଛନ୍ତି ନଗର ବିଜେପି ସଭାପତି।