କେନ୍ଦ୍ରାପଡ଼ା: ଏବେ ସାରା ବିଶ୍ବକୁ କବଳିତ କରି ରଖିଛି ମହାମାରୀ କୋରୋନା । ଆଉ ଏଭଳି ମହା ବିପତ୍ତି ସମୟରେ ନେତାଙ୍କ ଠାରୁ ଆରମ୍ଭ କରି ରାଜନେତା ପର୍ଯ୍ୟନ୍ତ ସମସ୍ତେ ସହାୟତାର ହାତ ବଢାଉଛନ୍ତି । କିନ୍ତୁ ନା ଅଛି ଖଣ୍ଡେ ଘର, ନା ଜମି ନା ଖାଇବାକୁ ମୁଠେ ଦାନା, ଭିକ୍ଷାବୃତ୍ତି କରି ଚଳୁଥିବା ଜଣେ ବୃଦ୍ଧା ମୁଖ୍ୟମନ୍ତ୍ରୀ ରିଲିଫ୍ ଫଣ୍ଡକୁ ଦାନ କରିଛନ୍ତି 5000 ଟଙ୍କା । ତାଙ୍କର ଏଭଳି ବଦାନ୍ୟତା ଏବେ ସମସ୍ତଙ୍କ ପାଇଁ ସାଜିଛି ପ୍ରେରଣା । ସେ ହେଉଛନ୍ତି କେନ୍ଦ୍ରାପଡ଼ା ରାଜକନିକା ବ୍ଲକ ଜାଗୁଳାଇପଡା ପଞ୍ଚାୟତ ଏକତଳା ଗାଁର ସରୋଜିନୀ ଦାସ ।
ଦୀର୍ଘ ଦିନ ହେବ ଭିକ୍ଷାବୃତ୍ତି କରି ଚଳି ଆସୁଥିବା ସରୋଜିନୀ ଚାଲିଚାଲି ଆସି ରାଜକନିକା ବିଡ଼ିଓଙ୍କୁ ନିଜ ସଞ୍ଚିତ ପୁଞ୍ଜିରୁ ପାଞ୍ଚ ହଜାର ଟଙ୍କା ମୁଖ୍ୟମନ୍ତ୍ରୀଙ୍କ କୋରୋନା ସହାୟତା ପାଣ୍ଠିକୁ ଦାନ କରିଛନ୍ତି । ସରୋଜିନୀଙ୍କ କହିବା ମୁତାବକ କୋରୋନା ଲକଡାଉନ ସମୟରେ ତାଙ୍କ ପରି ଅନେକ ଦିନଦୁଃଖୀ ଅଛନ୍ତି ଯିଏ ମୁଠାଏ ଖାଇବାକୁ ପାଉନାହାନ୍ତି । ତାଙ୍କ ସଞ୍ଚିତ ପଇସା ଯଦି କିଛି ଭୋକିଲା ପେଟକୁ ଦାନା ଦେଇ ପାରିବ ତେବେ ସେ ସେତିକିରେ ବହୁତ ଖୁସି ହେବେ । କେବଳ ସଞ୍ଚିତ ଅର୍ଥକୁ ମୁଖ୍ୟମନ୍ତ୍ରୀଙ୍କ ସହାୟତା ପାଣ୍ଠିକୁ ଦାନ କରିଛନ୍ତି ତାହା ନୁହେଁ, ତାଙ୍କ ଉଦାରତା ଓ ମାନବିକତା ଆହୁରି ଅନେକ କଥା ବୟାନ କରୁଛି । ଲକଡାଉନ ସମୟରେ ରାଜକନିକା ସାମ୍ବାଦିକ ସଂଘ ତରଫରୁ ଦିନଦୁଃଖୀ ଏବଂ ନିଃସହାୟମାନକୁ ରନ୍ଧାଖାଦ୍ୟ ଓ ଶୁଖିଲା ଖାଦ୍ୟ ବଣ୍ଟାଯାଉଥିବା ଖବର ପାଇ ସରୋଜିନୀ ସଂଘକୁ ନିଜ ପୁଞ୍ଜିରୁ ଦୁଇ ହଜାର ଟଙ୍କା ମଧ୍ୟ ଦାନ କରିଛନ୍ତି ।