କେନ୍ଦ୍ରାପଡା: ମୋ ପାଖରେ ଟିଉସନ ହୋଇନାହଁ ମାର୍କ ନାହିଁ, +୨ ଆଡମିଶନ ଆମ ସ୍କୁଲରେ କରିବ ନାହିଁ ତ ମାର୍କ ନାହିଁ ! ଛାତ୍ରଛାତ୍ରୀଙ୍କ ଭବିଷ୍ୟତକୁ ନେଇ ଏମିତି ଖେଳ ଖେଳାଯାଇଛି କେନ୍ଦ୍ରାପଡ଼ା ଜିଲ୍ଲାର ଏକ ଘରୋଇ ଇଂରାଜୀ ମାଧ୍ୟମ ବିଦ୍ୟାଳୟରେ । ଯାହାର ଅଭିଯୋଗ ଆଣିଛନ୍ତି ଖୋଦ ଛାତ୍ରଛାତ୍ରୀ ଓ ଅଭିଭାବକ ।
କୋରୋନା କାରଣରୁ ଚଳିତବର୍ଷ ବନ୍ଦ ରହିଥିଲା ସିବିଏସଇ ପରୀକ୍ଷା । ଗତବର୍ଷର ନବମ ଶ୍ରେଣୀର ମାର୍କ ଓ ଚଳିତବର୍ଷ କ୍ଳାସ ୟୁନିଟ ଟେଷ୍ଟର ମାର୍କକୁ ମିଶାଇ ସିବିଏସଇ ଦଶମ ଶ୍ରେଣୀର ପରୀକ୍ଷାଫଳ ପ୍ରକାଶିତ ହେବା ପରେ ଆରମ୍ଭ ହୋଇଥିଲା ଘରୋଇ ସ୍କୁଲରେ ପାଠ ପଢୁଥିବା ବିଦ୍ୟାର୍ଥୀ ଏବଂ ଅଭିଭାବକଙ୍କ ପ୍ରତିକ୍ରିୟା । ଜିଲ୍ଲାର 'କେନ୍ଦ୍ରାପଡ଼ା ପବ୍ଲିକ ସ୍କୁଲ' ନାମରେ ସଂଖ୍ୟାଧିକ ଛାତ୍ରଛାତ୍ରୀ ଆଣିଥିଲେ ଅଭିଯୋଗ । ସେମାନଙ୍କ ପାଖରେ ଟିଉସନ ନହେଲେ ମାର୍କ କମାଇଦେବାକୁ ଛାତ୍ରଛାତ୍ରୀଙ୍କୁ ଧମକ ଦେଇଥିଲେ ଶିକ୍ଷକ, ଯାହାକି ସେମାନଙ୍କ ମାର୍କରୁ ପ୍ରତିଫଳିତ ହୋଇଛି ବୋଲି ଅଭିଯୋଗ ହୋଇଛି । ଦଶମ ଶ୍ରେଣୀ ନ ସରୁଣୁ ଏହି ସ୍କୁଲରେ +୨ ପଢିଲେ ମାର୍କ ଅଧିକ ଦିଆଯିବ ବୋଲି ଶିକ୍ଷକ ଶିକ୍ଷୟିତ୍ରୀ କହିଥିବା ମଧ୍ୟ ଅଭିଯୋଗ ହୋଇଛି । ୯୦%ରୁ ଊର୍ଦ୍ଧ୍ବ ନମ୍ବର ରଖିବା ପାଇଁ ଆଶାୟୀ ଛାତ୍ରଛାତ୍ରୀଙ୍କୁ କମ ମାର୍କ ମିଳିଥିବା ଅଭିଯୋଗ କରି ଛାତ୍ରଛାତ୍ରୀ ଓ ଅଭିଭାବକ ସେମାନଙ୍କ ଖାତା ରିଚେକିଂ ପାଇଁ ଆବେଦନ କରିବାରୁ ଧମକ ଚମକ ଦିଆଯିବା ସହ ଖରାପ ବ୍ୟବହାର କରାଯାଉଥିବା ନେଇ ଜିଲ୍ଲାପାଳଙ୍କ ନିକଟରେ ଅଭିଯୋଗ କରାଯାଇଛି ।