କେନ୍ଦ୍ରାପଡା: ଆଉ ମାତ୍ର କିଛି ଘଣ୍ଟାର ଅପେକ୍ଷା ପରେ ଆରମ୍ଭ ହୋଇଥାନ୍ତା ଓଡିଶା ପ୍ରସିଦ୍ଧ ଓଳକଣା ମେଳଣ । ଘଣ୍ଟଘଣ୍ଟା ଓ ଡିଜେ ଲାଇଟ ମାଧ୍ୟମରେ ପ୍ରକମ୍ପିତ ହୋଇଥାନ୍ତା ମେଳଣ ପଡିଆ । କିନ୍ତୁ କୋଭିଡ ସଂକ୍ରମଣକୁ ଦୃଷ୍ଟିରେ ରଖି କେନ୍ଦ୍ରାପଡା ଜିଲ୍ଲା ପ୍ରଶାସନ ଓଳକଣା ମେଳଣ ପଡ଼ିଆର ୫୦୦ ମିଟର ପରିଧି ପର୍ଯ୍ୟନ୍ତ ଗତ ୨୬ ତାରିଖ ସକାଳ ୬ ଘଟିକାରୁ ରବିବାର ରାତି ୧୧ ଟା ପର୍ଯ୍ୟନ୍ତ ୧୪୪ ଧାରା ଜାରି କରିଛି ।
କେବଳ ବିଧି ରକ୍ଷା କରିବା ପାଇଁ କୋଭିଡ କଟକଣା ମଧ୍ୟରେ ବିନା ଭକ୍ତରେ ମେଳଣ ଅନୁଷ୍ଠିତ ହେବ ବୋଲି ଜିଲ୍ଲା ପ୍ରଶାସନ ସୂଚନା ଦେଇଛି । ଓଡ଼ିଶାର କୋଣ ଅନୁକୋଣରେ ମେଳଣ ହେଉଛି । ହେଲେ ସବୁ ସ୍ଥାନରେ ପ୍ରେମମୟ ଶ୍ରୀକୃଷ୍ଣ ଓ ପ୍ରେମର ରାଣୀ ରାଧାଙ୍କ ମିଳନ ହେଉଥିବାବେଳେ ଓଳକଣାରେ ହରିହରଙ୍କ ମିଳନ ହୋଇଥାଏ । ଯାହାକୁ ଦେଖିବା ପାଇଁ ଓଡ଼ିଶାର କୋଣ ଅନୁକୋଣରୁ ହଜାର ହଜାର ସଂଖ୍ୟାର ଶ୍ରଦ୍ଧାଳୁମାନଙ୍କ ଭିଡ଼ ଜମିଥାଏ । ମାତ୍ର ମେଳଣ ପଡିଆରେ 144 ଧାରା ଜାରି ହେବାପରେ ଶ୍ରଦ୍ଧାଳୁମାନେ ନିରାଶ ହୋଇଛନ୍ତି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ