କେନ୍ଦ୍ରାପଡା: ଗତକାଲି(ଶନିବାର) କେନ୍ଦ୍ରାପଡା ଜିଲ୍ଲା ମହାକାଳପଡ଼ା ଥାନା ଅଳାଇଲୋ ପଞ୍ଚାୟତ ବବକରପୁର ଗାଁରେ ଘଟିଥିବା ଗୁଳିକାଣ୍ଡ ଘଟଣାକୁ ଇତିମଧ୍ଯରେ ୨୪ ଘଣ୍ଟା ବିତିଗଲାଣି । କିନ୍ତୁ, କେଉଁ କାରଣ ପାଇଁ ଗୁଳିକାଣ୍ଡ ଘଟି ଜଣଙ୍କର ମୃତ୍ଯୁ ଘଟିଲା ତାହା ଏପର୍ଯ୍ୟନ୍ତ ଅସ୍ପଷ୍ଟ ରହିଛି । ପୋଲିସ୍ ଦୁଇ ଅପରାଧିଙ୍କ ସହିତ ଅନ୍ୟ ଦୁଇଜଣଙ୍କୁ ଅଟକ ରଖିଥିବାର କେନ୍ଦ୍ରାପଡା ଏସପି ପ୍ରତିକ୍ରିୟାରେ କହିଥିବା ବେଳେ କେଉଁ କାରଣ ପାଇଁ ଏହି ଗୁଳିକାଣ୍ଡ ଘଟିଲା ସେ ପ୍ରସଙ୍ଗରେ କ୍ୟାମେରା ଆଗରେ ଏସପି ମୁହଁ ଖୋଲିନାହାନ୍ତି ।
ବବକରପୁର ଗୁଳିକାଣ୍ଡ ଘଟଣାରେ ସାଇଣ୍ଟିଫିକ ଟିମର ତଦନ୍ତ, କାରଣ ଏବେ ବି ଅସ୍ପଷ୍ଟ
ମୃତ ଅରବିନ୍ଦଙ୍କ ପୁଅ ଶୁଭକେଶର ସାଙ୍ଗମାନଙ୍କ ଠାରୁ ମିଳିଥିବା ସୂଚନା ଅନୁଯାୟୀ, କିଛିଦିନ ହେବ କୌଣସି କାରଣକୁ ନେଇ ଶୁଭକେଶକୁ ଫୋନ ଯୋଗେ ଧମକ ଦିଆଯାଉଥିଲା । ଅନ୍ୟପଟରେ ପ୍ରେମ ସମ୍ପର୍କକୁ ନେଇ ଏହିପରି ଗୁଳିକାଣ୍ଡ ଘଟିଛି ବୋଲି ଚର୍ଚ୍ଚା ଜୋର ଧରିଛି । ଯେଉଁ ଦୁଇ ଅପରାଧି ଗୁଳିକାଣ୍ଡ ଘଟାଇଥିଲେ ସେମାନଙ୍କୁ କିଏ ପଠାଇଥିଲା ତାହା ଜଣାପଡିନାହିଁ ।