କେନ୍ଦ୍ରାପଡା: ମାଡି ଆସୁଛି ବାତ୍ୟା ‘ଅମ୍ଫାନ’ । ଏହାର ଗତିପଥ ନେଇ ଏପର୍ଯ୍ୟନ୍ତ କୌଣସି ସ୍ପଷ୍ଟ ସୂଚନା ନଥିବା ବେଳେ ଉତ୍ତର ଉପକୂଳ ଜିଲ୍ଲାଗୁଡିକରେ ଏହାର ପ୍ରଭାବ ଅଧିକ ରହିପାରେ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ ବିଭାଗ । ଶୁକ୍ରବାର କେନ୍ଦ୍ରାପଡା ଜିଲ୍ଲାର ବିଭିନ୍ନ ଗୁରୁତ୍ବପୂର୍ଣ୍ଣ ବିଭାଗଗୁଡିକ ସହିତ ଜିଲ୍ଲାପାଳ ବୈଠକ କରି ସମ୍ଭାବ୍ୟ ବାତ୍ୟା ଅମ୍ଫାନ ସମ୍ପର୍କରେ ଆଲୋଚନା କରିଛନ୍ତି ।
ଏହି ଆଲୋଚନାରେ ସମ୍ଭାବ୍ୟ ବାତ୍ୟାର କିପରି ସଫଳତାର ସହିତ ମୁକାବିଲା କରାଯିବ ସେନେଇ ଯୋଜନା ପ୍ରସ୍ତୁତ ହୋଇଛି । ସେହିପରି ଜିଲ୍ଲାର ମୋଟ 249ଟି ପଞ୍ଚାୟତ ସରପଞ୍ଚମାନଙ୍କ ସହ ମଧ୍ୟ ଆଲୋଚନା କରାଯାଇଥିବା ସୂଚନା ଦେଇଛନ୍ତି ଜିଲ୍ଲାପାଳ ସମର୍ଥ ବର୍ମା । ତେବେ ଜିଲ୍ଲାରେ ମୋଟ 117ଟି ବାତ୍ୟା ଆଶ୍ରୟସ୍ଥଳୀ ରହିଥିବା ବେଳେ କିଛି ଆଶ୍ରୟସ୍ଥଳୀକୁ ସଙ୍ଗରୋଧ କେନ୍ଦ୍ର ଭାବେ ଗ୍ରହଣ କରାଯାଇଛି । ତେଣୁ ସେହି ଆଶ୍ରୟସ୍ଥଳୀ ଗୁଡିକ ନିକଟରେ ଥିବା ସ୍କୁଲ ଘର ଗୁଡିକୁ ବାତ୍ୟା ପାଇଁ ବ୍ୟବହାର କରାଯିବ ବୋଲି ସୂଚନା ଦେଇଛନ୍ତି ଜିଲ୍ଲାପାଳ ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ