କେନ୍ଦ୍ରାପଡା: ଅନୁସୂଚିତ ଜନଜାତି ମହିଳାଙ୍କ ପାଇଁ ଉଦ୍ଦିଷ୍ଟ ଜିଲ୍ଲାର ଏକମାତ୍ର ଜୋନରେ ଜୋରଦାର ପ୍ରଚାରରେ ଲାଗିପଡିଛନ୍ତି ଦୁଇଦଳର ପ୍ରାର୍ଥୀ । ଅନ୍ୟପଟେ ନାମାଙ୍କନ ପତ୍ର ଦାଖଲ କରି ପ୍ରଚାର ମୈଦାନକୁ ଓହ୍ଲାଇ ନାହାନ୍ତି କଂଗ୍ରେସ ପ୍ରାର୍ଥିନୀ । ଆମେ କହୁଛୁ କେନ୍ଦ୍ରାପଡ଼ା ୩୨ନଂ ଜିଲ୍ଲା ପରିଷଦ ଜୋନ କଥା । ଏହି ଜୋନ ଅଧିନରେ ଡାଙ୍ଗମାଳ, କୃଷ୍ଣନଗର, ଖମାରସାହି, ତାଳଚୁଆ, ବାଘମାରୀ, ରଙ୍ଗଣୀ, କେରୁଆପାଳ, ସାତଭାୟା, ଗୁପ୍ତି, ଈଶ୍ୱରପୁର, ଘଡ଼ିଆମାଳକୁ ମିଶାଇ ମୋଟ ୧୧ଟି ପଞ୍ଚାୟତର ୪୪୪୨୯ ଭୋଟର ଚଳିତ ପଞ୍ଚାୟତ ନିର୍ବାଚନରେ ମତଦାନ କରିବେ । ଭୌଗୋଳିକ ଦୃଷ୍ଟିକୋଣରୁ ଏହି ଜୋନ ଅଧିନରେ ଥିବା ପଞ୍ଚାୟତ ଗୁଡିକ ନଦୀକୂଳରେ ଅବସ୍ଥିତ ହୋଇଥିବା ବେଳେ ଏହି ଜୋନ ବିଶ୍ୱପ୍ରସିଦ୍ଧ ଉଦ୍ୟାନ ଭିତରକନିକାକୁ ପ୍ରତିନିଧିତ୍ୱ କରୁଛି ।
ଅନ୍ୟପଟେ ପ୍ରାକୃତିକ ବିପର୍ଯ୍ୟୟ ବାତ୍ୟା ଓ ବନ୍ୟା ବର୍ଷକରେ ଦୁଇଥର ଲେଖାଏଁ ଦେଖୁଛି ଏହି ଜୋନ । ଟିକିଏ ଅଣ୍ଟା ସଳଖି ଛିଡା ହେବା ବେଳକୁ ପୁଣିଥରେ ପ୍ରାକୃତିକ ବିପର୍ଯ୍ୟୟ ଏମାନଙ୍କୁ ତଳିତଳାନ୍ତ କରାଇଥାଏ । ସେହିପରି ବିଭିନ୍ନ ମୌଳିକ ସମସ୍ୟାକୁ ସମାଧାନ କରିବା ଦିଗରେ ନେତାଙ୍କ ଠାରୁ ଆରମ୍ଭ କରି ପ୍ରଶାସକ ଯାଏଁ କେବଳ ପ୍ରତିଶ୍ରୁତି ଦେଉଥିବା ବେଳେ ଏଗୁଡ଼ିକୁ ପୂରଣ କରିବା ପାଇଁ କେହି ପଦକ୍ଷେପ ନିଅନ୍ତି ନାହିଁ । ସେହିପରି ଆବାସ, ରାସନ, ରାସ୍ତାଘାଟ, ଶିକ୍ଷା ଓ ସ୍ୱାସ୍ଥ୍ୟରେ ଏହି ଜୋନ ବହୁ ପଛରେ ଥିବା ବେଳେ ପିସି ରୂପକ ମହାମାରୀ ଏହି ଅଞ୍ଚଳରେ ଦ୍ରୁତ ବ୍ୟାପ୍ତ । ଏଗୁଡ଼ିକୁ ପୁଞ୍ଜିଭୁତ କରି ଚଳିତ ନିର୍ବାଚନୀ ମୈଦାନରେ ଜିଲ୍ଲାର ସର୍ବ କନିଷ୍ଠା ପ୍ରାର୍ଥିନୀ ଭାବେ ବିଜେପି ଦଳରୁ ଆରତୀ ହାଁସଦା ପହଞ୍ଚି ଲୋକମାନଙ୍କ ସହଯୋଗ ଓ ଆଶିଷ ନେଉଥିବା ବେଳେ ବିଜେଡି ପ୍ରାର୍ଥୀନୀ ନବୀନ ପଟ୍ଟନାୟକଙ୍କ ନିର୍ମଳ ଭାବମୂର୍ତ୍ତି ଓ ମହିଳା ସଶକ୍ତିକରଣକୁ ନେଇ ଭୋଟ ଭିକ୍ଷା କରୁଛନ୍ତି ।