ପୋଲିସ କବ୍‌ଜାରେ ଆନ୍ତଃଜିଲ୍ଲା ଡକାୟତ ଗ୍ୟାଙ୍ଗ

ଏକ ଆନ୍ତଃଜିଲ୍ଲା ଲୁଟେରା ଗ୍ଯାଙ୍ଗକୁ ଧରିଲା ପଟ୍ଟାମୁଣ୍ଡାଇ ପୋଲିସ । ବିଭିନ୍ନ ଥାନାରେ ୨୦ ରୁ ଉର୍ଦ୍ଦ୍ବ ମାମଲା ଥିବା ସୂଚନା । ସୁନା ଅଳଙ୍କାର ଓ ବନ୍ଧୁକ ଜବତ । ଅଧିକ ପଢନ୍ତୁ...

କେନ୍ଦ୍ରାପଡା: ପଟ୍ଟାମୁଣ୍ଡାଇ ପୋଲିସକୁ ବଡ ସଫଳତା । ପୋଲିସ କବଜାରେ ଆନ୍ତଜିଲ୍ଲା ଲୁଟେରା । କେନ୍ଦ୍ରାପଡା ସମେତ କଟକ, ଯାଜପୁର, ଜଗତସିଂହପୁର ଜିଲ୍ଲାରେ ଆତଙ୍କ ଖେଳାଇଥିବା ଲୁଟେରା ଗ୍ୟାଙ୍ଗର ୩ ଜଣ ସଦସ୍ୟଙ୍କ ସମେତ ମୁଖ୍ୟ ଅଭିଯୁକ୍ତର ପତ୍ନୀଙ୍କୁ ଗିରଫ କରିବାରେ ସଫଳ ହୋଇଛି ପୋଲିସ । ସେମାନଙ୍କ ଠାରୁ ୩ଟି ବାଇକ, ଗୋଟିଏ ବନ୍ଧୁକ, ସୁନାରୁପା ଅଳଙ୍କାର, ଲାପଟପ ସହିତ ଲକ୍ଷାଧିକ ଟଙ୍କାର ଚୋରି ସାମଗ୍ରୀ ଜବତ କରିଛି ପଟ୍ଟାମୁଣ୍ଡାଇ ପୋଲିସ ।

ସୂଚନା ମୁତାବକ ଗତ ମେ’ ମାସ ୧୮ ତାରିଖରେ ପଟ୍ଟାମୁଣ୍ଡାଇ ଥାନା ନସିପୁର ଗ୍ରାମରେ କିଛି ଦୁର୍ବୃତ୍ତ ନସୀପୁର ଗ୍ରାମର କୁଳମଣି ରାଉତଙ୍କ ଘରେ ପଶି ବନ୍ଧୁକ ଦେଖାଇ ସୁନାରୁପା ଅଳଙ୍କାର ସହ ଲକ୍ଷାଧିକ ଟଙ୍କା ଲୁଟି ନେଇଥିଲେ ।

ଏନେଇ କୁଳମଣୀଙ୍କ ସ୍ତ୍ରୀ ରଙ୍ଗଲତା ରାଉତ ପଟ୍ଟାମୁଣ୍ଡାଇ ଥାନାରେ ଏକ ଲିଖିତ ଅଭିଯୋଗ କରିବା ପରେ ପୋଲିସ ଅପରାଧୀଙ୍କୁ ଧରିବା ପାଇଁ ଏକ ସ୍ବତନ୍ତ୍ର ଟିମ ଗଠନ କରି ଜାଲ ବିଛାଇଥିଲା । ପରେ ଏହି ମାମଲାରେ ୪ଜଣଙ୍କୁ ଗିରଫ କରିବା ସହିତ ତାଙ୍କ ନିକଟରୁ ଲକ୍ଷାଧିକ ଟଙ୍କାର ଚୋରି ସାମଗ୍ରୀ ଜବତ କରିଥିଲା ପୋଲିସ । ତେବେ ଏହି ଲୁଟେରା ଗ୍ୟାଙ୍ଗ ବିରୋଧରେ କଟକ, ଯାଜପୁର, ଜଗତସିଂହପୁର, ଢେଙ୍କାନାଳ ସମେତ କେନ୍ଦ୍ରାପଡ଼ା ଜିଲ୍ଲାର ବିଭିନ୍ନ ଥାନାରେ ୨୦ରୁ ଉର୍ଦ୍ଧ୍ବ ମାମଲା ରହିଥିବା ସୂଚନା ଦେଇଛନ୍ତି କେନ୍ଦ୍ରାପଡ଼ା ଏସପି ।

କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ