PCV ଟୀକାକରଣ ଆରମ୍ଭ , ୭୧ କେନ୍ଦ୍ରରେ ଟିକା ନେଲେ ୧୩୫ ଶିଶୁ

କେନ୍ଦ୍ରାପଡାରେ ଆରମ୍ଭ ହେଲା ନିମୋକୋକାଲ କଞ୍ଜୁଗେଟ ଭ୍ୟାକ୍ସିନ (PCV) ଟୀକାକରଣ । ଶିଶୁମାନଙ୍କୁ ନିମୋନିଆ,ବୃକକ ସଂକ୍ରମଣରୁ ମିଳିବ ସୁରକ୍ଷା । ଭର୍ଚ୍ଚୁଆଲି ଶୁଭାରମ୍ଭ କଲେ ସ୍ବାସ୍ଥ୍ୟମନ୍ତ୍ରୀ । ଉପସ୍ଥିତ ଥିଲେ ଜିଲ୍ଲାପାଳ, ସାଂସଦ ଓ ବିଧାୟକ । ଅଧିକ ପଢନ୍ତୁ ....

କେନ୍ଦ୍ରାପଡା: ଜିଲ୍ଲାରେ ଶିଶୁମାନଙ୍କ ପାଇଁ ଆରମ୍ଭ ହେଲା ନିମୋକୋକାଲ କଞ୍ଜୁଗେଟ ଭ୍ୟାକ୍ସିନ (PCV) ଟୀକାକରଣ । ଭର୍ଚ୍ଚୁଆଲ ମାଧ୍ୟମରେ ଆଜି ସ୍ବାସ୍ଥ୍ୟମନ୍ତ୍ରୀ ନବ ଦାସ ଏହି ଟୀକାକରଣ କାର୍ଯ୍ୟକ୍ରମକୁ ଉଦଘାଟନ କରିବା ପରେ ୟୁନିସେଫ ପକ୍ଷରୁ ରାଜ୍ୟରେ କୋଭିଡ ମହାମାରୀ ସମୟରେ ଏହି କାର୍ଯ୍ୟକ୍ରମକୁ ଭୂୟସୀ ପ୍ରଶଂସା କରିଛନ୍ତି WHO ପ୍ରତିନିଧି । କେନ୍ଦ୍ରାପଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ଏହି ଟୀକାକରଣ କାର୍ଯ୍ୟକ୍ରମକୁ ଜିଲ୍ଲାପାଳ,କେନ୍ଦ୍ରାପଡ଼ା ସାଂସଦ ଓ ବିଧାୟକ ଉପସ୍ଥିତ ରହି ଆନୁଷ୍ଠାନିକ ଭାବେ ଉଦଘାଟନ କରିଥିଲେ ।

ଆଜି ଜିଲ୍ଲାର ମୋଟ 71ଟି କେନ୍ଦ୍ରରେ ମୋଟ 135ଜଣ ଶିଶୁଙ୍କୁ ଏହି ଟୀକା ଦିଆଯିବା ପାଇଁ ଵ୍ୟଵସ୍ଥା କରାଯାଇଛି । ପିସିଭି ଟିକା ପୁର୍ବରୁ ଦେୟଯୁକ୍ତ ହୋଇଥିବା ବେଳେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ଏହାକୁ ଦେୟମୁକ୍ତ ଓ ପର୍ଯ୍ୟାୟକ୍ରମେ 5ବର୍ଷ ପର୍ଯ୍ୟନ୍ତ ଶିଶୁଙ୍କୁ ଏହି ଟିକା ଦିଆଯିବା ପାଇଁ ବ୍ୟବସ୍ଥା କରାଯାଇଛି ବୋଲି କହିଛନ୍ତି କେନ୍ଦ୍ରାପଡା ବିଧାୟକ । ସେହିପରି ଏହି ଟିକା ନେବା ଦ୍ବାରା ଶିଶୁମାନଙ୍କର ରୋଗ ପ୍ରତିରୋଧକ ଶକ୍ତି ବୃଦ୍ଧି ହେବା ସହ ନିମୋନିଆ,ବୃକକ ସଂକ୍ରମଣ ଜନିତ ମୃତ୍ୟୁକୁ ରୋକ ଲଗାଯାଇପାରିବ ବୋଲି କହିଛନ୍ତି ସାଂସଦ ଅନୁଭବ ।

କେନ୍ଦ୍ରାପଡାରୁ ରାଧାକାନ୍ତ ମହନ୍ତି, ଇଟିଭି ଭାରତ