କେନ୍ଦ୍ରାପଡା: ଗତ ବିଧାନସଭା ସମୟରେ ବାତିଲ ହୋଇଥିବା ପାଟକୁରା ବିଧାନସଭା ନିର୍ବାଚନ ଏବେ ଶେଷ ପର୍ଯ୍ୟାୟରେ ପହଞ୍ଚିଛି । ଆସନ୍ତା କାଲି ପାଟକୁରାକୁ ମିଳିବ ନୂଆ ବିଧାୟକ । ଏଥିପାଇଁ ଗତ 20 ତାରିଖରେ ମତଦାନ ଶେଷ ହୋଇଥିବା ବେଳେ ଆସନ୍ତା କାଲି ଭୋଟ ଗଣତି ହେବ । ଭୋଟ ଗଣତି ପାଇଁ କେନ୍ଦ୍ରାପଡା କଲେଜରେ କରାଯାଇଥିବା ଭୋଟ ଗଣତି କେନ୍ଦ୍ରରେ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯିବା ସହ ଆବଶ୍ୟକ ପ୍ରସ୍ତୁତି ପ୍ରଶାସନ ଶେଷ କରିଛି ।
2 ଲକ୍ଷ 44,447 ଭୋଟର ବିଶିଷ୍ଟ ଏହି ନିର୍ବାଚନ ମଣ୍ଡଳୀରେ ଗତ 20 ତାରିଖରେ 73% ମତଦାନ ହୋଇଛି । ଅର୍ଥାତ ପାଖାପାଖି 1ଲକ୍ଷ 80 ହଜାର ଭୋଟର ସେମାନଙ୍କର ପ୍ରାର୍ଥୀଙ୍କୁ ଭୋଟ ଦେଇଛନ୍ତି। ତେବେ ମତଦାନ ସମୟରେ ତିନି ପ୍ରମୁଖ ଦଳର ପ୍ରାର୍ଥୀ ନିଜନିଜର ବିଜୟ ପାଇଁ ଆଶାବାଦୀ ଥିବା ବେଳେ ଜନମତ କାହା ସପକ୍ଷରେ ଯିବ ତାହା ଆସନ୍ତାକାଲିର ଗଣତି ପରେ ସ୍ପଷ୍ଟ ହେବ । ଗତ 2004 ମସିହାରୁ ଲଗାତାର ଭାବରେ ବିଜୁ ଜନତା ଦଳର ପ୍ରାର୍ଥୀ ଏହି ଆସନରୁ ବିଜୟୀ ହୋଇଛନ୍ତି। ତେବେ ଏହି ନିର୍ବାଚନରେ ଦଳ କଡା ମୁକାବିଲାର ସମ୍ମୁଖିନ ହୋଇଛି । ସେହି ଦୃଷ୍ଟିରୁ କାହା ସପକ୍ଷରେ ମତଦାନ ଯିବ ଆକଳନ କରିବା ମୁସ୍କିଲ ।