କେନ୍ଦ୍ରାପଡା:ଅଗ୍ନିଶମ ବାହିନୀର ସମାୟାନୁଯାୟୀ ପଦକ୍ଷେପ ଯୋଗୁଁ ବଞ୍ଚିଗଲା ଅମୂଲ୍ୟ ଜୀବନ। ଗତକାଲି ବିଳମ୍ବିତ ରାତି ସମୟରେ ତିନିଜଣଙ୍କୁ ବନ୍ୟା ଘେରରୁ ଅଗ୍ନିଶମ ବାହିନୀ ଉଦ୍ଧାର କରିଥିବା ବେଳେ ଆଜି ଅପରାହ୍ନରେ ୧୫ଜଣଙ୍କୁ ଉଦ୍ଧାର କରିଛି ବିଭାଗ। ମହାକାଳପଡା ବ୍ଲକ ଚଉମୁହାଣି ଠାରେ ଥିବା ଦଶରାଜପୁର ଡିଆ ଠାରେ ଦୀର୍ଘଦିନ ହେବ ଘରକରି ଦୁଇ ଜଣ ପୁରୁଷ ଓ ଜଣେ ମହିଳା କନ୍ଦା ଚାଷ କରୁଥିଲେ । ଏନେଇ ବନ୍ୟା ପାଣିର ସ୍ତର ବଢିବା ସହିତ ସେମାନେ ରହିଥିବା ଢିପ ସ୍ଥାନଟି ବୁଡିବାକୁ ଲାଗିଥିଲା ।
ସୂଚନା ଅନୁସାରେ ଚାଷୀମାନେ ଟର୍ଚ୍ଚ ପକେଇ ସାହାର୍ଯ୍ୟ ମାଗିବା ପରେ ସ୍ଥାନୀୟ ଲୋକେ ଟର୍ଚ୍ଚ ଲାଇଟ ଦେଖି ମହାକାଳପଡା ବିଡିଓଙ୍କୁ ଜଣାଇଥିଲେ। ବିଡ଼ିଓ ଦେବାଶିଷ ରାଉତ ଏବଂ ତହସିଲଦାର ସୌଭାଗ୍ୟ ରଞ୍ଜନ ପଣ୍ଡା ସେଠାରେ ପହଞ୍ଚି ମହାକାଳପଡା ଅଗ୍ନିଶମ ବାହିନୀର କର୍ମଚାରୀଙ୍କ ସହାୟତାରେ ବିଳମ୍ବିତ ରାତି ସମୟରେ ତିନି ଜଣଙ୍କୁ ଉଦ୍ଧାର କରି କୂଳକୁ ଆଣିଛନ୍ତି।ଉଦ୍ଧାର ହୋଇଥିବା ମହିଳା ଏବଂ ତାଙ୍କ ସ୍ବାମୀଙ୍କ ଘର ମାର୍ଶାଘାଇ ବ୍ଲକ ବଡପାଳଗଡା ହୋଇଥିବା ବେଳେ ଅନ୍ୟ ଜଣେ ବ୍ୟକ୍ତିଙ୍କ ଘର କୁଜଙ୍ଗ ବ୍ଲକ ଚକ୍ରଧରପୁର ବୋଲି ଜଣାପଡିଛି।