କେନ୍ଦ୍ରପଡା: ଚାଲିଛି ପାର୍ବଣ ଋତୁ । ମା'ଦୁର୍ଗାଙ୍କ ମେଲାଣି ପରେ ଧରାପୃଷ୍ଠରେ ଅବତରଣ କରିଛନ୍ତି ମା'ଲକ୍ଷ୍ମୀ । ରାଜ୍ୟରେ ବିଭିନ୍ନ ମଣ୍ଡପରେ ପୂଜା ପାଉଛନ୍ତି ଗଜଲକ୍ଷ୍ମୀ । କେନ୍ଦ୍ରପଡା ଜିଲ୍ଲା ନୂଆ ବସଷ୍ଟାଣ୍ଡ ନିକଟସ୍ଥ ଥାନପତି ଗଜଲକ୍ଷ୍ମୀଙ୍କ ପାଖରେ ମାଣବସେ ଯାହା ଅଲଗା ସ୍ଥାନର ଲକ୍ଷ୍ମୀପୂଜା ଠୁ ଟିକେ ଅଲଗା । ହିନ୍ଦୁ ପରମ୍ପରା ଅନୁସାରେ ମାର୍ଗଶୀର ମାସ ଗୁରୁବାରେ ମାଣବସେ । ହେଲେ ଏଠି ଗଜଲକ୍ଷ୍ମୀଙ୍କ ସହିତ ରୀତିନୀତିରେ ମଣ୍ଡପରେ ମାଣ ବସିଛି । କାହିଁ କେଉଁ ଅମଳରୁ ପୂଜା ମଣ୍ଡପରେ ମାଣ ବସି ଆସୁଛି ।
୧୯୩୭ ମସିହାରୁ ଥାନପତିରେ ବସୁଛି ମାଣ । ମା' ଗଜଲକ୍ଷ୍ମୀଙ୍କ ନଅ ଦିନ ପୂଜା ମଧ୍ୟରେ ପଡୁଥିବା ଗୁରୁବାର ଦିନ ମାଣବସା ସମ୍ପର୍ନ୍ନ ହୋଇଥାଏ । କେନ୍ଦ୍ରାପଡ଼ା ସହରର ମର୍ଦ୍ଦରାଜ ପରିବାରର ବୋହୂମାନେ ମାଣ ବସାଇଥାନ୍ତି। ସମ୍ପୂର୍ଣ୍ଣ ଓଡ଼ିଆ ବିଧି ମୁତାବକ ମା'ଙ୍କୁ ମାଣ ଖଟୁଲିରେ ବସାଯାଇ ଧାନ ବେଣ୍ଟି, ମୂଳା, ଆଖୁ, କଦଳୀ ଓ ଅନ୍ୟାନ୍ୟ ପୂଜା ସାମଗ୍ରୀରେ ସୁସଜ୍ଜିତ କରି ମାଙ୍କୁ ଭୋଗ ଲାଗି କରାଯାଇଥାଏ। ମଧ୍ୟାହ୍ନରେ ଦହି ପଖାଳ,ଶାଗ ଇତ୍ୟାଦି ଭୋଗ ଲାଗି କରି ସନ୍ଧ୍ୟାରେ ମଣ୍ଡାପିଠା ନୈବେଦ୍ୟ ଅର୍ପଣ କରି ପୂଜା ଶେଷ ହୋଇଥାଏ । ସୁନ୍ଦର ଭାବେ ଚିତା ପକାଇବା ସହ ପ୍ରତ୍ୟେକ ବର୍ଷ ଏହି ପୂଜା ମଣ୍ଡପକୁ ମାଣବସା ଗୁରୁବାର ବ୍ରତ କରିବା ପାଇଁ କାହିଁ କେତେ ସ୍ଥାନରୁ ଛୁଟି ଆସିଥାନ୍ତି ମହିଳା।