କେନ୍ଦ୍ରାପଡା: ଅଭାବ ଅସୁବିଧା ହିଁ ଉଦ୍ଭାବନର ଜନନୀ । କୋରୋନା ମହାମାରୀ ସମୟରେ ଏହି ଉକ୍ତି ନିଜ ଯଥାର୍ଥତା ପ୍ରତିପାଦନ କରିଥିବା ବେଳେ କେନ୍ଦ୍ରାପଡା ଜିଲ୍ଲା ମହାକାଳପଡା ବ୍ଲକ ଧନିଆପଡା ଗ୍ରାମର ଯଶୋବନ୍ତ ବେହେରା ଏହାକୁ ଦେଇଛନ୍ତି ସଫଳତାର ରୂପ । ପେଶାରେ ଜଣେ ମାର୍କେଟିଂ ମ୍ୟାନେଜର ଥିବା 48 ବର୍ଷୀୟ ଯଶୋବନ୍ତ ଲକଡାଉନ ଓ ସଟଡାଉନରେ ରୋଜଗାର ହରାଇଥିବା ବେଳେ ଆତ୍ମନିର୍ଭରଶୀଳ ହେବା ପାଇଁ ସେ ପାଲଟିଯାଇଛନ୍ତି ଜଣେ ବାଉଁଶ କାରିଗର ।
ରୋଜଗାର ଛଡାଇଲା ଲକଡାଉନ, ରାହା ଦେଖାଇଲା ଫାଇନ ଆର୍ଟ
ଘରେ ଥିବା ବାଉଁଶ ବୁଦାରୁ ବାଉଁଶ ଆଣି ସେ ପ୍ରଥମେ ଏକ ସିଢି ନିର୍ମାଣ କରିଥିଲେ । ଆଉ ସେହି ସିଢିରେ ଏବେ ସେ ଚଢିବାରେ ଲାଗିଛନ୍ତି ଗୋଟିଏ ପରେ ଗୋଟିଏ ସଫଳତାର ପାହାଚ । ପାଠ ପଢୁଥିବା ସମୟରେ ଏକ ଘରୋଇ ଅନୁଷ୍ଠାନରୁ ଫାଇନ ଆର୍ଟର ଶିକ୍ଷା ଗ୍ରହଣ କରିଥିଲେ ଯଶୋବନ୍ତ । ପରେ ତାଙ୍କର ଏହି ଶିକ୍ଷାକୁ ମାର୍ଜିତ କରିଥିଲେ ବଢେଇ କାର୍ଯ୍ୟ କରୁଥିବା ତାଙ୍କ ପିତା । କିଛି ଭିନ୍ନ ଲକ୍ଷ୍ୟ ଥିବାରୁ ପରବର୍ତ୍ତୀ ସମୟରେ ସେ ଜଣେ ମାର୍କେଟିଂ ମ୍ୟାନେଜର ଭାବେ ଅବସ୍ଥାପିତ ହୋଇଥିଲେ ।