କେନ୍ଦ୍ରାପଡା: ପ୍ରକଳ୍ପ ପୂର୍ବରୁ ଘନେଇଲାଣି ବିବାଦ । ଜଙ୍ଗଲ ଜମି ଚିହ୍ନଟ ପାଇଁ ନୋଟିସ୍ ଜାରି କରିଛନ୍ତି ସରକାର । ଏହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ସରକାର ଜଙ୍ଗଲ ଜମି ଅଧିଗ୍ରହଣ କରିବା ପାଇଁ ନୋଟିସ ଦେଇଥିବା ବେଳେ କିଛିଟା ବ୍ୟକ୍ତିବିଶେଷଙ୍କୁ କାହିଁକି ଏହି ନୋଟିସ ଦିଆଯାଇ ନାହିଁ ତାହାକୁ ନେଇ ଅଭିଯୋଗ କରିଛନ୍ତି ସ୍ଥାନୀୟ ବାସିନ୍ଦା । ନିରପକ୍ଷ ଭାବେ ଜମି ଅଧିଗ୍ରହଣ ନକରାଗଲେ ମାପ କରାଇ ନଦେବାକୁ ଚେତାବନୀ ଦିଆଯାଇଛି । କେନ୍ଦ୍ରାପଡା ଜିଲ୍ଲା ମହାକାଳପଡ଼ା ତହସିଲ ଅଧିନରେ ଥିବା ହରିଆବାଙ୍କରେ ବିବାଦ ଦେଖିବାକୁ ମିଳିଛି ।
ସୂଚନାନୁଯାୟୀ, କେନ୍ଦ୍ରାପଡା ମହାକାଳପଡ଼ା ତହସିଲ ଅଧୀନରେ ଆର୍ସେଲର ମିତ୍ତଲ ଏକ ବୃହତ ଷ୍ଟିଲପ୍ଲାଣ୍ଟ ପ୍ରତିଷ୍ଠା ପାଇଁ ଭୂ-ଅଧିଗ୍ରହଣ ପ୍ରକ୍ରିୟା ଶେଷ ହୋଇଛି । ଏହାରି ମଧ୍ୟରେ ତହସିଲ ପକ୍ଷରୁ ଜଙ୍ଗଲ କିସମ ଜମି ଉପରେ ଅନାଧିକାର ଆଡ୍ଡା ବା ଜବରଦଖଲ କରିଥିବା ଲୋକଙ୍କୁ ନୋଟିସ ପ୍ରଦାନ କରାଯାଇଛି । ତେବେ ହରିଆବାଙ୍କ ଗ୍ରାମର କିଛି ଲୋକଙ୍କୁ ସେମାନଙ୍କ ସ୍ଥିତିବାନ ଜମିକୁ ଜଙ୍ଗଲ କିସମ-୨ ଜମି ଦର୍ଶାଇ ମାପ କରାଯିବା ପାଇଁ ନୋଟିସ ପ୍ରଦାନ କରାଯାଇଛି । ଯାହାକୁ ବିରୋଧ କରି ଶତାଧିକ ପୁରୁଷ ଓ ମହିଳା ମହାକାଳପଡ଼ା ତହସିଲ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛନ୍ତି ।
ସେମାନଙ୍କ ଅଭିଯୋଗ ଅନୁଯାୟୀ, ବାପା ଅଜା ଅମଳରୁ ସ୍ଥିତିବାନ ପ୍ଲଟରେ ସେମାନେ ରହି ଆସୁଥିବା ବେଳେ ଏବେ ସେଠାରେ ଜଙ୍ଗଲ କିସମ-୨ ଜମି ଆସିଲା କିପରି ? ଆଉ ଯଦି ଆସିଲା ଖାଲି ଗରିବ ଲୋକଙ୍କର ଜମି ମାପ କରାଯିବ, କିନ୍ତୁ ଧନୀଙ୍କ ଜମି କାହିଁକି ମପାଯିବ ନାହିଁ ? ହରିଆବାଙ୍କରେ ରହୁଥିବା ସମସ୍ତ ଅଧିବାସୀଙ୍କ ଜମି ମାପ କରାଯାଉ । ନଚେତ ମାପ କରିବାକୁ ଗଲେ ବିରୋଧ କରାଯିବ ବୋଲି ଚେତାବନୀ ଦେଇଛନ୍ତି ସ୍ଥାନୀୟ ଅଧିବାସୀ । ସେମାନେ ପ୍ରକଳ୍ପକୁ ବିରୋଧ କରୁନଥିବା ବେଳେ ପ୍ରଶାସନ ସେମାନଙ୍କୁ ବିରୋଧ କରିବାରୁ ନିବୃତ୍ତ ରହିବା ପାଇଁ ସମସ୍ତଙ୍କ ଜମି ମାପ କରୁ ବୋଲି ବିକ୍ଷୋଭକାରୀ ଦାବିପତ୍ର ପ୍ରଦାନ କରିଛନ୍ତି । ତହସିଲଦାରଙ୍କ ଅନୁପସ୍ଥିତିରେ ଅତିରିକ୍ତ ତହସିଲଦାରଙ୍କୁ ସେମାନଙ୍କ ଦାବିପତ୍ର ପ୍ରଦାନ କରିଛନ୍ତି ।