କେନ୍ଦ୍ରାପଡା: ରାଜନଗର ବ୍ଲକ ହାତିଆଗଡି ଗାଁରେ ପୋଖରୀତୁଠରେ ବାସନ ମାଜିବା ବେଳେ ମହିଳାଙ୍କୁ କୁମ୍ଭୀର ଟାଣିନେବା ଘଟଣାରେ ତୀବ୍ର ଉତ୍ତେଜନା ପ୍ରକାଶ ପାଇଛି । କୁମ୍ଭୀର ଆକ୍ରମଣ କରିବା ପରେ ଦୀର୍ଘ ସମୟ ପର୍ଯ୍ୟନ୍ତ ମହିଳାଙ୍କ ପତ୍ତା ନମିଳିବାରୁ ସ୍ଥାନୀୟ ଲୋକେ ଭିତରକନିକାକୁ ସଂଯୋଗ କରୁଥିବା ରାସ୍ତା ଅବରୋଧ କରିଥିଲେ । ଏହି ଅଘଟଣ ପାଇଁ ଲୋକେ ପ୍ରଶାସନିକ ଅବହେଳାକୁ ଦାୟୀ କରିଥିଲେ । ଖବର ପାଇ ରାଜନଗର ତହସିଲଦାର, ବିଡ଼ିଓ, ଅଗ୍ନିଶମ ଅଧିକାରୀ ଓ ଥାନା ଅଧିକାରୀ ପହଞ୍ଚି ଲୋକଙ୍କୁ ବୁଝାସୁଝା କରିଥିଲେ । ଉତ୍ୟକ୍ତ ଲୋକେ ମହିଳାଙ୍କୁ ମୃତ ଅଥବା ଜୀବିତ ଉଦ୍ଧାର କରିବା ପାଇଁ ଅଡି ବସିଥିଲେ । ପ୍ରଶାସନ ପକ୍ଷରୁ ଜେସିବି ଲଗାଇ ଦଳକୁ ସଫେଇ କରାଯିବା ପରେ କ୍ଷତବିକ୍ଷତ ମୃତଦେହକୁ ଉଦ୍ଧାର ହୋଇଥିଲା । ତେବେ ତହସିଲଦାର ଆର୍ଥିକ ସହାୟତା ଘୋଷଣା କରିବା ପରେ ରାସ୍ତାରୋକ ହଟିଥିବା ସୂଚନା ମିଳିଛି ।
ଘଟଣାନୁଯାୟୀ, ବୁଧବାର ଅପରାହ୍ନ ପ୍ରାୟ ୨ଟା ବେଳେ ହାତୀଆଗଡ଼ି ଗାଁର ନଳିନୀ ଓରଫ ସୀତାରାଣୀ ଦାସ ତାଙ୍କ ବାଡ଼ି ପଛପଟ ପୋଖରୀ ତୁଠରେ ଗାଧୋଇ ସାରି ବାସନ ମାଜୁଥିବା ସମୟରେ ଏକ ବିରାଟକାୟ କୁମ୍ଭୀର ତାଙ୍କୁ ଟାଣି ନେଇଥିଲା । ସୀତାରାଣୀ ଜୀବନ ବଞ୍ଚାଇବା ପାଇଁ ଡାକ ପକାଇଥିଲେ । ହେଲେ ଅପରାହ୍ନ ସମୟ ହୋଇଥିବାରୁ କାଁ ଭାଁ ଲୋକେ ତାଙ୍କ ଚିତ୍କାର ଶୁଣି ପୋଖରୀ ନିକଟରେ ପହଞ୍ଚିଥିଲେ । କୁମ୍ଭୀର ଟାଣି ନେଉଥିବା ଦେଖି ଲୋକେ ବଞ୍ଚାଇବାକୁ ଚେଷ୍ଟା କରିଥିଲେ ସୁଦ୍ଧା କୁମ୍ଭୀରଟି ସୀତାଙ୍କୁ ଟାଣିନେଇ ଚଡଦିଆ କେନାଲ ମଧ୍ୟରେ ରଖିଥିଲା । ପରେ ଘଟଣାସ୍ଥଳରେ ରାଜନଗର ବନବିଭାଗ ଓ ଅଗ୍ନିଶମ ବାହିନୀ ପହଞ୍ଚି ଥିବାବେଳେ ମହିଳାଙ୍କୁ ଉଦ୍ଧାର କରିବାରେ ଅସମର୍ଥ ହୋଇଥିଲେ ।