କେନ୍ଦ୍ରାପଡା: ରାଜନଗର ମାଣପଡ଼ା ଗାଁରେ 6 ଦିନ ହେବ ଦୁଇଟି ମୃତଦେହ ପଡିଥିବା ଘଟଣା। ଅଭିଯୁକ୍ତମାନଙ୍କୁ ଗିରଫ ନକରିବା ପର୍ଯ୍ୟନ୍ତ ଅନ୍ତିମ ସଂସ୍କାର ହେବ ନାହିଁ ବୋଲି ଅଡ଼ି ବସିଛନ୍ତି ଗାଁ ଲୋକେ। ଦୀର୍ଘ ୬ ଦିନ ବିତିଯାଇଥିଲେ ମଧ୍ୟ ଶବ ସତ୍କାର ହୋଇ ନ ପାରିବାରୁ ଗାଁର କାହାରି ଘରେ ଚୁଲି ଜଳିନାହିଁ। ଅପରପକ୍ଷରେ ଆଜି ଗ୍ରାମବାସୀଙ୍କୁ ବୁଝାସୁଝା କରିବା ପାଇଁ ଆସିଥିବା ରାଜନଗର ତହସିଲଦାର, ବିଡ଼ିଓ ଏବଂ ଆଇଆଇସିଙ୍କୁ ଅଟକ ରଖିଛନ୍ତି ଗ୍ରାମବାସୀ।
କେନ୍ଦ୍ରାପଡ଼ା ରାଜନଗର ମାଣପଡ଼ା ଗାଁର ପ୍ରମିଳା ନାଥ(୪୫) ଓ ତାଙ୍କ ଅବିବାହିତ ଝିଅ ସତ୍ୟପ୍ରିୟା ନାଥ(୨୨)ଙ୍କ ମୃତଦେହ ଦୁଇଟି ପୃଥକ ପୃଥକ ସ୍ଥାନରୁ ମିଳିବା ପରେ ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ଅଭିଯୋଗ କରିଛନ୍ତି ଗ୍ରାମବାସୀ ଓ ପ୍ରମିଳାଙ୍କ ଝିଅ। ଉକ୍ତ ଗାଁର ସଞ୍ଜୟ ବେହେରା ନାମକ ଜଣେ ଯୁବକ ପ୍ରମିଳାଙ୍କ ପୁଅ ନଥିବା ଓ ଅସହାୟତାର ସୁଯୋଗ ନେଇ ତାଙ୍କ ସଞ୍ଚିତ ଅର୍ଥ ହଡପ କରିବା ସହ ଝିଅ ସତ୍ୟପ୍ରିୟାକୁ ଅନ୍ତସତ୍ତ୍ଵା କରିଥିବା ଅଭିଯୋଗ କରିଛନ୍ତି ଗ୍ରାମବାସୀ।