କେନ୍ଦ୍ରାପଡା: ପଟ୍ଟାମୁଣ୍ଡାଇ ମହିଳା ମହାବିଦ୍ୟାଳୟରେ ଅଧ୍ୟାପିକା ନିଯୁକ୍ତି ଜାଲିଆତି । ଜଣେ ଅଧ୍ୟାପିକାଙ୍କୁ ବିଭିନ୍ନ ସମୟରେ ଏକାଧିକ ଥର ଦିଆଯାଇଛି ନିଯୁକ୍ତି । ଏନେଇ ସୂଚନା ଅଧିକାର ଆଇନ ଖୋଲିଛି ଅଧ୍ୟାପିକା ନିଯୁକ୍ତିର ଗୁମର ।
ପଟ୍ଟାମୁଣ୍ଡାଇ ମହିଳା ମହାବିଦ୍ୟାଳୟରେ ନିଯୁକ୍ତି ଜାଲିଆତି, ଜଣେ ଅଧ୍ୟାପିକାଙ୍କୁ ଏକାଧିକ ଥର ନିଯୁକ୍ତି ପୂର୍ବରୁ ଅଧ୍ୟକ୍ଷା ନିଯୁକ୍ତିରେ ଚଞ୍ଚକତା କରାଯାଇଥିବା ଅଭିଯୋଗ ହୋଇଥିବାବେଳେ ଏବେ ଅଧ୍ୟାପିକାଙ୍କ ନିଯୁକ୍ତିକୁ ନେଇ ଉଠିଛି ପ୍ରଶ୍ନ । କିପରି ଏକାଧିକ ଥର ଜଣେ ଅଧ୍ୟାପିକା ନିଯୁକ୍ତି ପାଇଛନ୍ତି ଓ ମହାବିଦ୍ୟାଳୟ ପକ୍ଷରୁ କିପରି ଏହି ନିଯୁକ୍ତି ଦିଆଯାଇଛି ସେନେଇ ଆରଟିଆଇ ବଳରେ ମିଳିଥିବା ତଥ୍ୟ ଦର୍ଶାଉଛି ।
ଚିନ୍ମୟୀ ଜେନା ନାମକ ଜଣେ ଅଧ୍ୟାପିକାଙ୍କ ନିଯୁକ୍ତିରେ ଏଭଳି ଜାଲିଆତି କରାଯାଇଥିବା ସୂଚନା ଅଧିକାର ଆଇନ ବଳରେ ଜଣାପଡିଛି । କେଉଁଠି ତାଙ୍କର ନିଯୁକ୍ତି ତାରିଖ 14.08.2013 ବୋଲି ଦର୍ଶାଯାଇଥିବାବେଳେ କେଉଁଠି 02.07.2012 ବୋଲି ଦର୍ଶାଯାଇଛି । ସେହିପରି ମହାବିଦ୍ୟାଳୟରୁ ଉତ୍କଳ ବିଶ୍ବବିଦ୍ୟାଳୟକୁ ଆଫିଲିଏସନ ପାଇଁ ପଠାଯାଇଥିବା ଚିଠିରେ ନିଯୁକ୍ତି ତାରିଖ 01.09.2013 ଲେଖାଅଛି। ତେବେ ସବୁଠୁ ବଡ କଥା ହେଉଛି ସେ 19.12.2015 ରିଖରେ ସମ୍ବଲପୁର ବିଶ୍ବବିଦ୍ୟାଳୟରୁ ଓଡିଆ ବିଭାଗରେ ଏମଏଏମଫିଲ ପାସ କରିଛନ୍ତି ବୋଲି ମହାବିଦ୍ୟାଳୟରେ ବସିଥିବା ତ୍ରୟୋବିଂଶତମ ଅଧିବେଶନର ନକଲରୁ ଜଣାପଡିଛି ।
ସେପଟେ 2013 ମସିହା ଅଗଷ୍ଟ 14 ତାରିଖରେ ଅଧ୍ୟାପକ ଶ୍ରୀଧର ବେହେରା ଯୋଗ ଦେଇଥିବାବେଳେ ଚିନ୍ମୟୀ ତାଙ୍କ ପରେ ଅଧ୍ୟାପିକା ଭାବେ ଯୋଗ ଦେଇଥିବା ଶ୍ରୀଧର ଅଭିଯୋଗ କରିଛନ୍ତି । ଅନ୍ୟପଟେ ଅଧ୍ୟାପକ ଚାକିରି ନେଇ ଇଣ୍ଟରଭ୍ୟୁ ନେଇଥିବା ପ୍ୟାନେଲର ସଦସ୍ୟା ଅନୁପମା ଦାସ ଏହି ଘଟଣାରେ ହଡବଡେଇଯାଇ କେବେ ନିଯୁକ୍ତି ହୋଇଥିବା ଠିକ୍ରେ କହିପାରିନାହାଁନ୍ତି ।
ଅନ୍ୟପକ୍ଷରେ ଏ ଘଟଣାକୁ ନେଇ ମହାବିଦ୍ୟାଳୟ ଅଧ୍ୟକ୍ଷା ନିଜ ଦୋଷକୁ ଘୋଡାଇବାକୁ ଯାଇ ଗଣମାଧ୍ୟମ ତାଙ୍କ ମହାବିଦ୍ୟାଳୟ କାମରେ ହସ୍ତକ୍ଷେପ ନକରୁ ବୋଲି କହିଛନ୍ତି । ସେହିପରି ଘଟଣାକୁ ଖାମଖିଆଲ ଭାବେ ମହାବିଦ୍ୟାଳୟର ସଭାପତି ତଥା ଅତିରିକ୍ତ ଜିଲ୍ଲାପାଳ ନେଉଥିବା ତାଙ୍କ କଥାରୁ ସ୍ପଷ୍ଟ ହେଉଛି । ତେବେ ଏହି ପ୍ରସଙ୍ଗରେ ଦରକାର ପଡିଲେ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରାଯିବ ବୋଲି ବିଧାୟକ ଧ୍ରୁବ ସାହୁ କହିଛନ୍ତି ।
ଏହି ଘଟଣାକୁ ନେଇ ଗତବର୍ଷ ଶ୍ରୀଧର ଅନଶନରେ ବସିଥିବାବେଳେ ଘଟଣାର ତଦନ୍ତ କରାଯିବ ବୋଲି ପ୍ରତିଶୃତି ମିଳିଥିଲା । ତେବେ କେବେ ସେହି ପ୍ରତିଶୃତି ପୂରଣ ହେଉଛି ଓ ମହାବିଦ୍ୟାଳୟର ଏଭଳି ରହସ୍ୟମୟ ନିଯୁକ୍ତି ତଥ୍ୟ ସାମ୍ନାକୁ ଆସୁଛି ତାକୁ ହିଁ ଅପେକ୍ଷା ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
