କେନ୍ଦ୍ରାପଡା: ଛାଡିଯାଇଛି ବନ୍ୟା ଜଳ, କମିଛି ନଦୀର ଜଳସ୍ତର କିନ୍ତୁ କମିନାହିଁ ବନ୍ୟାର କରାଳ ରୂପରୁ ବାସ ହରାଇଥିବା ଲୋକର ଦୁରାବସ୍ଥା । ବାସହରା ହୋଇ ଗାଁର କ୍ଲବ ଘରେ କିଏ ବଢ଼ିଲା ଝିଅକୁ ନେଇ ଆଶ୍ରୟ ନେଇଛନ୍ତି ତ ଆଉ କିଏ ଭଙ୍ଗା ଘରକୁ ସଜାଡିବାରେ ଲାଗିଛି । କିନ୍ତୁ ଏପର୍ଯ୍ୟନ୍ତ ମିଳିପାରିନାହିଁ ବନ୍ୟା କ୍ଷୟକ୍ଷତି ଜନିତ ଅର୍ଥରାଶି ।
ଗତ ଅଗଷ୍ଟ ୨୮ରେ ବିରୂପା ନଦୀବନ୍ଧ ଭାଙ୍ଗି କେନ୍ଦ୍ରାପଡ଼ା ଡେରାବିଶ୍ ବ୍ଲକ ବେଣୀପୁର ଗାଁର ୩୦ରୁ ଊର୍ଦ୍ଧ୍ବ କଚ୍ଚା ଘର ଭାଙ୍ଗିଥିବା ବେଳେ ୨୦ ପରିବାର ବାସହରା ହୋଇଥିଲେ । ତେବେ ଏହି ବନ୍ୟାରେ ସର୍ବାଧିକ କ୍ଷତିଗ୍ରସ୍ତ ହୋଇଥିବା ଅକ୍ଷୟ ମହାରଣାଙ୍କ ପରିବାର ବାସହରା ହୋଇ ସ୍ଥାନୀୟ କ୍ଲବ ଘରେ ଆଶ୍ରୟ ନେଇଥିବା ବେଳେ ସାଙ୍ଗରେ ରହୁଛି ଜଣେ ବଢ଼ିଲା ଝିଅ । ଅକ୍ଷୟ ପକ୍ଷାଘାତରେ ପୀଡିତ ଥିବା ବେଳେ ଘର କହିଲେ ତାଙ୍କର ୪ବଖରା ମାଟିଘର ଓ ଦୁଇ ବଖରାର ଗୁହାଳ । କିନ୍ତୁ ବନ୍ୟା ମାଡ଼ିଆସିବା ଫଳରେ କେବଳ ନିଜ ଜୀବନ ବଞ୍ଚାଇ ଉଚ୍ଚ ସ୍ଥାନକୁ ଏମାନେ ଚାଲି ଯାଇଥିବା ବେଳେ ସୁତାଟିଏ ମଧ୍ୟ ଉଦ୍ଧାର କରିପାରିନଥିଲେ।
ସେହିପରି ବନମାଳୀ ମହାରଣା, ଗୌତମ ମହାରଣାଙ୍କ ପରିବାରର ସମାନ ଅବସ୍ଥା। ଅକ୍ଷୟଙ୍କ ପରିବାର ସହିତ ଗୋଟିଏ କ୍ଲବ ଘରେ ଗୌତମ ଓ ବନମାଳୀଙ୍କ ପରିବାର ରହୁଥିବା ବେଳେ ଏମାନଙ୍କ ଅବସ୍ଥା ମଧ୍ୟ ସମାନ। ବନ୍ୟା ବିତ୍ପାତର ଏକମାସରୁ ଊର୍ଦ୍ଧ୍ବ ସମୟ ବିତିଯାଇଥିଲେ ମଧ୍ୟ ଏପର୍ଯ୍ୟନ୍ତ ଏହି ପରିବାରଙ୍କୁ ୫୦ କିଲୋ ଚାଉଳ, ୫୦୦ଟଙ୍କା ବ୍ୟତୀତ ରାଜ୍ୟ ସରକାର ବନ୍ୟା ପ୍ରପୀଡ଼ିତଙ୍କ ପାଇଁ ଘୋଷଣା କରିଥିବା ପିନ୍ଧାବସ୍ତ୍ର ପାଇଁ ସହାୟତା ବାସନକୁସନ ବାବଦକୁ ସାହାଯ୍ୟ କିଛି ମିଳିନି । କେବଳ ଏହି ପରିବାର ନୁହେଁ, ଗ୍ରାମର ନବୀନ ମହାରଣା, ମଧୁସୂଦନ ମହାରଣା, ମନୋରମା ସାହୁ, ଡମ୍ବରୁଧର ଭଞ୍ଜଙ୍କ ଭଳି ୨୦ଟି ପରିବାର ଏବେ ବାସହରା ହୋଇ ଏଣେତେଣେ ମୁଣ୍ଡ ଗୁଞ୍ଜିଛନ୍ତି । ଆଉ ବର୍ଷା ହେଲେ ଭଗବାନ ଭରସାରେ ଜୀବନ କଟୁଛି ।