କେନ୍ଦ୍ରାପଡ଼ା: ଗ୍ୟାସ ସିଲିଣ୍ଡର ଫାଟି 2 ବୋଟ ଡ୍ରାଇଭରଙ୍କ ମୃତ୍ୟୁ ହୋଇଛି । କେନ୍ଦ୍ରାପଡା ଜମ୍ବୁ ମେରାଇନ ଥାନା ଅନ୍ତର୍ଗତ ଖରିନାସୀ ଠାରେ ଏହି ଅଭାବନୀୟ ଘଟଣା ଘଟିଛି । ତେବେ ମୃତକ ଦ୍ବୟ ଆଠଗଡର ପ୍ରକାଶ ସାମନ୍ତରାୟ ଓ ଗଞ୍ଜାମର ସୁବାଷ ସାହୁ ବୋଲି ଜଣାପଡିଛି ।
ସୂଚନାନୁଯାୟୀ, ମୃତକ ଦୁହେଁ ପୁର୍ବରୁ ନୌସେନା ବିଭାଗରେ କାର୍ଯ୍ୟରତ ଥିଲେ । ଅବସର ପରେ ରାଜ୍ୟ ସରକାରଙ୍କ ସାମୁଦ୍ରିକ ଥାନାରେ ସମୁଦ୍ର ମଧ୍ୟରେ ତଟରକ୍ଷକ ଭାବରେ ନିଯୁକ୍ତି ପାଇ ଏମାନେ ତଟରକ୍ଷୀ ବିଭାଗର ତଥା ଜମ୍ବୁ ସାମୁଦ୍ରିକ ଥାନାରେ ବୋଟ ଚାଳକ ଥିଲେ ।
ଆଜି ସକାଳ ୮ଟା ରେ ପ୍ରକାଶ ସାମନ୍ତରାୟ ରୋଷେଇ କରିବାକୁ ଯାଇଥିବା ବେଳେ କୌଣସି କାରଣରୁ ଷ୍ଟୋଭରେ ନିଆଁ ଲାଗିଯାଇଥିଲା । ରୋଷେଇ ଘରେ ପେଟ୍ରୋଲ ଓ ଡିଜେଲ ଥିବାରୁ ଏହା ସମଗ୍ର କୋଠରୀକୁ ବ୍ୟାପି ଯାଇଥିଲା । ଫଳରେ ଘଟଣାସ୍ଥଳରେ ହିଁ ପ୍ରକାଶଙ୍କ ମୃତ୍ୟୁ ଘଟିଛି । ସେହିପରି ସୁବାଷ ସାହୁ ଗୁରୁତର ଆହତ ହୋଇଥିବା ବେଳେ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇ ଯାଉଥିବା ସମୟରେ ବାଟରେ ତାଙ୍କର ମୃତ୍ୟୁ ହୋଇଛି । ତେବେ ସୂଚନା ପାଇ ଜିଲ୍ଲା ଆରକ୍ଷୀ ଅଧିକ୍ଷକ ନୀତିଶେଖର ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇ ଥିବା ଜଣାପଡିଛି ।
ଏଠାରେ ପ୍ରଶ୍ନ ଉଠୁଛି ଯେ ରୋଷେଇ ଘରେ ପେଟ୍ରୋଲ ଓ ଡିଜେଲ କେଉଁ କାରଣରୁ ରଖାଯାଇଥିଲା । ତେବେ ସ୍ଥାନୀୟ ଲୋକଙ୍କ କହିବାନୁଯାୟୀ ଏଠାରେ ପ୍ରଥମ ଥର ନୁହେଁ ବାରମ୍ବାର ଏଭଳି ଅଘଟଣ ଘଟୁଛି । ପୋଲିସ କି ଅଗ୍ନିଶମ ବିଭାଗକୁ ମଧ୍ୟ ସୂଚନା ଦେଲେ ସେମାନେ ବିଳମ୍ବରେ ଆସୁଛନ୍ତି ।
କେନ୍ଦ୍ରାପାଡରୁ ରାଧାକାନ୍ତ ମହାନ୍ତି, ଇଟିଭି ଭାରତ
